Umuhanzi Khalid yemeje ko aryamana n'abo bahuje igitsina nyuma yo gutamazwa

Khalid Donnel Robinson ni umuhanzi akaba n'umwanditsi w'indirimbo uri mu bahagaze neza muri Amerika. Azwi mu gukora injyana zirimo 'R&B na Pop'. Yakoze indirimbo nyinshi zamamaye zirimo nka 'Better', 'Young Dumb & Broke', hamwe na 'Lovely'.

Uyu muhanzi yabaye iciro ry'imigani ku mbuga zirimo nka 'X' ndetse agarukwaho mu binyamakuru by'imyidagaduro nyuma y'uko atamajwe ko aryamana n'abo bahuje igitsina.

Ibi byabaye ubwo umusore bakundanaga yanditse ku mbuga ati: ''Khalid yatangiye kunshyiraho ibikangisho ko azambeshyera kuri polisi ko namwibye nyuma y'uko mubwiye ko ntagishaka gukundana nawe. Ni umuntu mubi kandi yari yarabahishe ko ari umutinganyi''.

Ubwo abafana be bari batangiye gusamira uyu musore hejuru bavuga ko abeshyera uyu muhanzi, Khalid ku giti cye yahise abyemera agira ati: 'Yego ndi umutinganyi' ndetse ashyiraho idarapo ry'umukororombya ribaranga.

Mu butumwa burebure Khalid yakomeje gucisha ku rubuga rwa X ye yavuze ko 'ntasoni binteye kandi ntakibazo ko ndi umutinganyi', yanasabye abantu ko barekera kubivugaho bakavuga iyindi ngingo kuko yaramaze kurambirwa abantu bamugize igitaramo ku mbuga.

Khalid w'imyaka 26 y'amavuko kandi yanatunguye benshi agira ati: ''Ntabwo nari narahishe ko ndi umutinganyi (Gay), ahubwo ntabwo nanjyaga mbivuga ko nkunda kudashyira hanze ubuzima bwanjye bwite kandi nta n'umwe byarebaga, icyo mpuriyeho namwe ni ukubaha umuziki''.

Icyakoze nubwo benshi batangiye kumunenga ko akundana n'abagabo bagenzi be, Khalid, yanashyigikiwe n'abamwe mu bafana be bamubwiye ko bazakomeza kumukunda kuko ari uburenganzira bwe gukunda uwo ashatse.

Umuhanzi Khalid uri mu bagezweho muri Amerika, yavuze ko ari umutinganyi

Yemeye ko aryamana n'abo bahuje igitsina nyuma y'uko umusore babikoranaga amushyize hanze

Khalid abinyujije ku rubuga rwa X, yemeje ko ari umu 'Gay' ndetse ko nta soni bimuteye