Nyuma ya The Ben, Bwiza mu mushinga w'indirimbo na Israel Mbonyi? - VIDEO

Ni umukobwa watangiranye imbaraga, ku buryo mu gihe cy’imyaka ibiri gusa, yari abashize gushyira hanze Album ye ya mbere, ndetse ari no kwitegura gukora igitaramo cyo kumurika Album ye ya Kabiri kizaba muri Werurwe 2025.

Aherutse kubwira InyaRwanda ko ageze kuri 70% ategura iyi Album, kuko byinshi mu byo yasabwaga yamaze kubikoraho, ni mu gihe ategereje abandi bahanzi n’abandi bagomba kuzayikoraho kugirango izabe irangiye.

Ni Album idasanzwe mu rugendo rw’uyu mukobwa, wagerageje gukorana cyane n’abahanzi bari mu myaka nk’iye. Ariko kandi aherutse gutungura benshi, ubwo yashyiraga hanze indirimbo ‘Best Friend’ yakoranye na The Ben.

Mu buryo bw’amajwi (Audio) yakozwe na Loader, ni mu gihe amashusho yafashwe akanatunganywa na John Elarts uri mu bakomeye mu Burundi. 

Bwiza yabwiye InyaRwanda ko gukorana na The Ben zari inzozi ze, kuko yatangiye kuvugana nawe ubwo yashyiraga hanze indirimbo ‘Ready’ akamuhamagara amutera imbaraga mu rugendo rwe rw’umuziki, nk’umukobwa uri kugaragaza impinduka.

Yavuze ati “Ndishimye cyane! Kuba kuri iyi nshuro mfite indirimbo nabashije gukorana na The Ben ni ibintu nifuzaga mu buzima bwanjye, kuko urebye hagati yanjye nawe harimo imyaka myinshi cyane noneho ku muntu nkawe wahiriwe n’umuziki, ni inzozi buri muhanzi wese yagira, ari mu bantu nakuze nkunda kugeza n’ubu.”

Uyu mukobwa yashimangiye ko zari inzozi ze gukorana indirimbo na The Ben, ku buryo kubasha kubigeraho ari kimwe mu byo kwishimira mu buzima bwe.

Akoranye indirimbo na The Ben, mu gihe InyaRwanda yahawe amakuru yizewe yemeza ko uyu mukobwa yamaze gufatira amajwi indirimbo ye na Israel Mbonyi, mu gihe bitegura kuba bayikorera amashusho y’abo.

Ubwo yavugaga kuri iyi ndirimbo ye na Israel Mbonyi, Bwiza yumvikanishije ko ari amakuru atakemeza ‘kuko ari ibivugwa’.

Kuri uyu wa Kane tariki 21 Ugushyingo 2024, Bwiza yasohoye ifoto ari kumwe na Israel Mbonyi, amushimira umwanya we, ndetse yumvikanisha ko yishimiye guhura n’umukozi w’Imana nka Israel Mbonyi.

Arenzaho ati “Maze wibuke kunsuhuriza Umuyobozi w’Umuryango Women Foundation Ministries, Apôtre Alice Mignonne Kabera.”

Mu batanze ibitekerezo kuri iyi foto, harimo Minisitiri w’Ububanyi n’Amahanga, Olivier Nduhungirehe wagaragaje ko iyi ifoto irimo abanyempano babiri kandi ko ‘nk’abafana turifuza ko mwakorana’.

The Ben na Israel Mbonyi basanzwe bafitanye ubushuti bw’igihe kirekire; ndetse bombi baherutse gutangaza ko bakoranye indirimbo ebyiri zigomba kuzasohoka mu gihe kiri imbere.

Bwiza yagaragaje ko yakozwe ku mutima no guhura na Israel Mbonyi batangiye gukorana indirimbo 

Bwiza aherutse gushyira ku isoko indirimbo ‘Best Friend’ yakoranye na The Ben 

KANDA HANO UREBE IKIGANIRO CYIHARIYE TWAGIRANYE NA BWIZA

KANDA HANO UREBE AMASHUSHO Y’INDIRIMBO YA BWIZA NA THE BEN