Tanzania ishobora gutakaza itike yo kujya mu gikombe cya Afurika

Kuwa Kabiri w'iki Cyumweru ni bwo ikipe ya Tanzania yari yakiriye iya Guinea mu mukino wo ku munsi wa Gatandatu mu itsinda E mu gushaka mu gushaka itike y'igikombe cy'Afurika cya 2026.

Ni umukino warangiye Tanzania itsinze igitego 1-0 cya Saimon Msuva ku munota wa 61 bituma ihita ikatisha itike y'igikombe cy'Afurika dore ko yahise ijya ku mwanya wa 2 mu itsinda n'amanota 10.

Nubwo iyi kipe y'igihugu yakatishije itike ariko kuri ubu ishobora guterwa mpaga  ikaba yayamburwa bitewe n'amakosa yakoze. 

Ishyirahamwe ry'umupira w'amaguru muri Guinea ryamaze kurega Tanzania mu mpuzamashyirahamwe y'umupira w'amaguru muri Afurika, CAF rivuga ko mu mukino wabahuje iyi kipe y'igihugu yakoze amakosa yo gukoresha umukinnyi utujuje ibyangombwa.

Ubwo umukino wari ugeze ku munota wa 73, ikipe y'igihugu ya Tanzania yakoze impinduka mu kibuga aho bashyizemo umukinnyi wambaye nimero 26, Ibrahim Aime kandi ku rupapuro rw'umukino rwemewe na CAF nta hantu iyi nimero iri. Uyu mukinnyi kuri uru rupapuro ahubwo yari yanditseho nimero 24.

Ibi byakozwe ntabwo byemewe n'amabwiriza ya CAF akaba ari nayo mpamvu ikipe y'igihugu ya Tanzania ishobora kwamburwa itike yo kujya mu gikombe cy'Afurika ikaba yahabwa Guinea yabaye iya gatatu mu itsinda.

Tanzania ishobora guterwa mpaga kubera amakosa yakoze mu misimburize