FIFA igiye guha amafaranga FC Barcelona kubera umukinnyi wayo wavunitse

Mu kwezi kwa 7 muri uyu mwaka ni bwo uyu mukinnyi yavunikiye mu mukino ikipe ye y'igihugu ya Uruguay yakinagamo na Brazil mu irushanwa rya Copa America.

Nyuma yo gukorerwa isuzuma byaje kwemezwa ko Ronaldo Araujo azamara amezi ane adakandagira mu kibuga none byitezwe ko azagaruka mu kibuga muri uku kwezi.

Kuri ubu impuzamashyirahamwe y'umupira w'amaguru ku Isi, FIFA igiye guha FC Barcelona amafaranga agera kuri Miliyoni 3 z'Amayero bijyanye n'uko uyu mukinnyi yari yavunikiye mu ikipe y'Igihugu.

Ubusanzwe hari amafaranga y'indishyi FIFA iba yarateganyirije amakipe ku bakinnyi baba baravunikiye mu makipe y'ibihugu. Aya mafaranga atangwa ku mukinnyi uzamara igihe kirenze iminsi 28 adakina aho ku munsi abarirwa amafaranga agera ku bihumbi 20 by'Amayero.

Ikipe ya FC Barcelona igiye kwakira iyi ndishyi y'akababaro nyuma y'uko mu mwaka ushize yari yabonye indi y'umukinnyi wayo Gabi wari wavunikite mu ikipe y'Igihugu ya Espagne ubwo yakinaga imikino yo gushaka itike y'igikombe cya Euro.

Mu mezi atandatu yamaze adakina, FC Barcelona yahawe agera kuri miliyoni 6 z'Amayero. Ntabwo ari aya gusa kuko iyi kipe iheruka no guhabwa andi mafaranga angana n'ibihumbi 300 by'Amayero kuri Pedri wavunikiye mu ikipe y'Igihugu ya Espagne ubwo yakinaga Euro ya 2024.

Ubwo bivuze ko muri rusange muri uyu mwaka ikipe ya FC Barcelona imaze kubona indishyi y'amafaranga agera kuri miliyoni 9 z'Amayero ku bakinnyi bayo 3 bavunitse.

FC Barcelona igiye guhabwa impozamarira nyuma yuko Ronald Araujo avunikiye mu ikipe y'Igihugu