Ikipe ya Rhode Island FC ikinamo Umunyarwanda Kwizera Jojea iri mu nzira zo kwegukana igikombe cya shampiyona y'icyiciro cya Kabiri muri Leta Zunze Ubumwe za Amerika nyuma y'uko itsinze Charleston Battery bari bahuriye ku mukino wa nyuma wo mu gace k'Uburasirazuba.
Ni mu mukino wa nyuma wakinwe mu rukerera rwo kuri iki Cyumweru tariki 17 Ugushyingo 2024 kuri Patriots Point.
Uyu mukino warangiye Rhode Island itsinze ibitego 2 bya Zachary Herviaux ku munota wa 43 na Noah Fuson ku munota wa 53 kuri 1 cya Charleston Battery cyatsinzwe na Juan David Torres ku munota wa 61.
Iyi kipe ikinamo Jojea Kwizera ariko akaba atari yagaragaye kuri uyu mukino kubera ko ari kumwe n'Amavubi aho yagiye gukina na Nigeria mu gushaka itike y'igikombe cya Afurika cya 2025 kizabera muri Morocco, yahise yegukana igikombe cyo mu gace k'Iburasirazuba.
Ibi byahise bihesha itike ikipe ya Rhode Island yo kugera ku mukino wa nyuma wa shampiyona y'icyiciro cya Kabiri muri Leta Zunze ubumwe za Amerika muri rusange.
Iyi kipe izahura na Colorado Springs Switchbacks FC dore ko ariyo yegukanye igikombe mu gace k'Iburengerazuba itsinze Las Vegas Lights FC igitego 1-0.
Umukino wa nyuma uzatanga uzegukana Igikombe cya Shampiyona uzahuza aya makipe yombi ku wa Gatandatu tariki 23 Ugushyingo 2024,icyo gihe noneho Kwizera Jojea usanzwe ubanzamo mu ikipe ya Rhode Island azabasha kuwukina.
Rhode Island yegukanye igikombe mu gace k'Uburasirazuba bikayigeza ku mukino wa nyuma wa shampiyona
Eng
RSS 
TANGA IGITECYEREZO