NBA: Los Angeles Lakers na Boston Celitics zagaragaje ubuhanga budasanzwe -VIDEO

Los Angeles Lakers bakomeje kwerekana imbaraga zidasanzwe muri NBA aho batsinze New Orleans Pelicans amanota 104 kuri 99 mu mukino ukomeye. Anthony Davis yigaragaje nk’umukinnyi w’agatangaza w’ikipe, atsinda amanota 31 akanakora rebounds 14.

LeBron James, umunyabigwi udashidikanywaho muri NBA, yatsinze amanota 21, harimo n’amanota atatu y’ingenzi yatanze icyizere mu masegonda ya nyuma y’umukino. Nubwo James atabashije gukora triple-double ye ya gatanu yikurikiranya, uruhare rwe rwafashije Los Angeles Lakers gukomeza umuvuduko w’imikino itanu batsinda bikurikiranya.

Ku rundi ruhande, Boston Celtics yatsinze Toronto Raptors amanota 126 kuri 123 mu mukino wagombaga gusozwa mu minota y’inyongera (overtime). Jayson Tatum yigaragaje nk’intwari atsinda amanota atatu y’intsinzi ku munota wa nyuma w’umukino (buzzer).

Jaylen Brown yayoboye Boston Celtics n’amanota 27, mu gihe Tatum yasoje afite amanota 24, rebounds 11 na assists 9. Ku rundi ruhande, Jakob Poeltl wa Toronto Raptors yafashije ikipe ye atsinda amanota 35, ariko ntibyari bihagije ngo babashe gutsinda Boston Celtics.

Charlotte Hornets basoje umukino mu buryo butazibagirana batsinda Milwaukee Bucks amanota 115 kuri 114. LaMelo Ball ni we wacunguye Hornets, atsinda free throws ebyiri mu masegonda ya nyuma.

Giannis Antetokounmpo wa Bucks yakoze triple-double ye ya mbere muri uyu mwaka (amanota 22, rebounds 15 na assists 12). Nyamara, ishoti rye ry’intsinzi ry’amanota abiri mu masegonda ya nyuma ryahushije, bityo Hornets bahesha abafana babo ibyishimo by’intsinzi.

Mavericks bari kongera kwigarura

Dallas Mavericks yakuyeho urugendo rw’imikino ine batsindwa bikurikiranya, batsinda San Antonio Spurs amanota 110 kuri 93. Kyrie Irving na Daniel Gafford buri umwe yatsinze amanota 22, naho Luka Doncic yongeyeho amanota 16.

Ku ruhande rwa  San Antonio Spurs, Victor Wembanyama wavuye mu kibuga kubera imvune y’ivi ry’iburyo. Uyu mukinnyi, uzwi nka “Wemby,” amaze gutangaza benshi muri uyu mwaka w’imikino, aho asanzwe atsinda amanota 22.7, rebounds 10.5, na blocks 3.7 ku giteranyo cya buri mukino.