Luke Shaw yagarutse mu mwiherero wa Manchester United nyuma y’imvune ikomeye

Manchester United ikomeje kwakira inkuru nziza ku bakinnyi bayo bari bamaze igihe baravunitse, aho Luke Shaw, umukinnyi w’inyuma, yagarutse mu myitozo nyuma yo kumara amezi atatu ari mu mvune. 

Shaw, ukinira ikipe y’igihugu y’u Bwongereza, yari amaze igihe atagaragara mu kibuga kuva muri Gashyantare ubwo yavunikaga imitsi yo mu itako, bikarangira adakinnye imikino y’igice cya nyuma cya Premier League umwaka ushize.

Nyuma yo gukira iyo mvune yo muri Gashyantare, yongeye kugira indi muri Kanama, abenshi bari biteze ko azagaruka mu kwezi kwa cumi nyuma y’imikino mpuzamahanga, ariko hari ikibazo yagize gituma agaruka atinze. Nubwo yari yakize mu buryo bw’ibanze, imvune ye yongeye kumugaruka nyuma y’igihe gito atangiye imyitozo.

Umutoza w’agateganyo wa Man United, Ruud van Nistelrooy, yemeje ko hari icyizere cyinshi ku bijyanye no kugaruka kwa Shaw mu kibuga, agira ati, “Luke na Leny Yoro bose basubiye mu myitozo, kandi turi kwishimira kubona abo basore bakomeye bava mu mvune.”

Yishimiye kandi kugarura abakinnyi nka Christian Eriksen na Mason Mount bagarutse mu kibuga mu mukino wa Europa League batsinzemo PAOK ibitego 2-0. Eriksen yakinnye iminota 30, na Mount nawe agaruka ameze neza. 

Uyu musore mushya, Leny Yoro wavuye muri Lille ariko yari yaragize ikibazo mu myitozo mu minsi ishize, ubu nawe yagarutse mu myitozo.

Ni inkuru ishimishije ku bakunzi ba Manchester United n’umutoza Ruud van Nistelrooy, dore ko bafite icyizere cyo kubona abakinnyi bakomeye basubira mu kibuga mu gihe cy’imikino igiye gukomeza muri Premier League.

Myugariro wa Manchester United wari umaze igihe kinini mu mvune yagarutse mu myitozo

Luke Shaw na Leny Yoro bombi bari gukira imvune