Uko Intsinzi ya Donald Trump yunguye abaherwe 10 ba mbere ku Isi asaga Miliyari $64 ku munsi umwe

Ku wa Gatatu w’iki cyumweru, nta kindi cyavugwaga uretse amatora muri Leta Zunze Ubumwe za Amerika aho byarangiye Donald Trump ariwe wegukanye intsinzi, bituma yongera kuba Perezida wa Amerika nyuma y'uko yayoboye iki gihugu kuva mu mwaka wa 2016 kugera mu mwaka wa 2020.

Nk’uko ikinyamakuru Bloomberg’s Billionaire Index cyatangaje,ngo uyu munsi w’amatora muri Amerika wasize abaherwe ba mbere binjije asaga Miliyari $64 ku munsi umwe gusa.

Uwungutse cyane muri iyi minsi ni Elon Musk umwe mu bafana bakomeye ba Trump, aho umutungo we wazamutseho Miliyari $26.5 ukugera kuri Miliyari $290 nk’uko Bloomberg ibitangaza.

Umutungo wa Jeff Bezos washinze Amazon wazamutseho Miliyari $7.1 nyuma y'icyumweru amaze afashe icyemezo cyo kudashyigikira Kamala Harris. Larry Ellison, washinze Oracle kandi ushyigikiye Trump, nawe umutungo we wazamutseho Miliyari $5.5 kuri uyu wa Gatatu.

Abandi bungutse muri iyi minsi barimo abayobozi ba Microsoft, Bill Gates na Steve Ballmer, abayobozi ba Google, Larry Page na Sergey Brin, ndetse n’umuyobozi wa Berkshire Hathaway, Warren Buffett.Nubwo aba banyamafaranga bose batashyigikiye umukandida uwo ari we wese muri uyu mwaka, mu bihe byashize bagiye bavuga amagambo yo gushyigikira umukandida w’ishyaka ry'Abademokarate.

Bloomberg yavuze ko ari ubwa mbere kuva mu mwaka wa 2012 habayeho kwiyongera kw’inyungu ku munsi umwe. Nk’uko bamwe mu bayobozi b’ibigo bikomeye babitangaza, bavuga ko bafitiye icyizere Donald Trump ko ubucuruzi bugiye kongera kuzamuka.

Michael  Block, umuyobozi wa AgentSmyth yagize ati"Hari icyizere n’ihumure rikomeye ko hagiye kubaho politiki ifasha ubucuruzi no koroshya imisoro, cyane cyane nyuma yo gutsinda Inteko Ishinga Amategeko kw'Aba-Republicans" 

Nka Elon Musk washyigikiye Donald Trump mu bikorwa byo kwiyamamaza ndetse akitanga Miliyoni 119$, byatumye yunguka arenga Miliyari 26.5$ dore ko imigabane y'uruganda rwe rukora imodoka za Tesla rwahise rwiyongeraho agaciro ka Miliyari 15$ zihwanye na 12,764%

Si aba baherwe gusa bungukiye mu ntsinzi ya Donald Trump ahubwo na nyirubwite nawe yarungutse ndetse n’ibikorwa bye biratumbagira. Nyuma y'uko CNN yari imaze gutangaza ko Donald Trump yatsinze amatora, imigabane y’urubuga Truth Social rwa Donald Trump, yazamutseho 30%.

Imigabane ye ingana na Miliyoni 114.75 ifite agaciro ka Miliyari $5.3 mu buryo bw’igihe gito hashingiwe kuri izo nyungu zajeho nyuma y’amatora. Ni mu gihe mbere yari Miliyari $3.9 ubwo isoko ry’imari ryafungwaga ku munsi w’amatora.