APR FC yabonye intsinzi ya kabiri muri shampiyona nyuma yo gutsinda Vision FC

Kuri uyu wa Kane itariki 7 Ugushyingo 2024 ikipe ya Vision yakiriye APR FC mu mukino w’umunsi wa cyenda wa shampiyona y’u Rwanda 2024-25 "Rwanda Premiel League".

Mbere y’uyu mukino, amakimbe yombi yashakaga gutsinda byanze bikunze kuko imyanya ariho iteye isoni. APR FC  yari iya 15 n’amanota 4 n’umwenda w’ibitego bibiri, naho ikipe ya Vision yo n’ubwo itari mu murongo utukura yari iya 14 n'amanota 5 n’umwenda w’ibitego bibiri.

Ni umukino ikipe ya APR FC yatangiranye imbaraga zidasanzwe ku bakinnyi bayo nka Mamadou Sy wagerageje ishoti rya kure ariko ku mahirwe make ya APR FC umupira unyura ku ruhande. APR yagumye gukinana imbaraga zidasanzwe ishaka igitego.

Ku munota wa 11 APR FC yari yacumbitse imbere y’izamu rya Vision FC yaje kubona amahirwe ya Penaliti yatewe neza na Mamadou Sy n’uko itangira kuyobora umukino n’igitego kimwe ku busa bwa Vision FC.

Vision ikimara gutsindwa igitego, umutoza mushya wayo Abdul Mbarushimana yatangiye gukina agerageza kugarira ariko akananyuzamo akataka. Igice cya mbere cyarangiye Vision yari yiyemeje gutsinda uyu mukino igiye kuruhuka itarabona igitego cyo kwishyura.

Mu gice cya kabiri, ikipe Vision FC yagarukanye imbaraga n’uko abakinnyi bayo nka Twizeriman Onesme bakagerageza amashoti ya kure ariko biguma kwanga. 

Ku munota wa 49 ba myugariro ba Vision bongeye kwitera icyuma ubwo Byiringiro Gilbert yari ageze mu rubuga rw’amahina nuko Ibrahim aramutega umusifuzi atanga penaliti.

Iyi penaliti ya APR FC yatewe neza na Mamadou Sy wari watsinze igitego cya mbere n’ubundi kuri penaliti, APR FC ikomeza kuyobora umukino n’ibitego bibiri ku busa bwa Vision.

Ku munota wa 58 ikipe ya APR FC yarase amahirwe y’igitego cya gatatu aho Richmond Lamptey yahaye umupira Mamadou Sy n’uko asanga wamaze kugera mu ntoki za James wari mu izamu rya Vision FC.

Ku munota wa 62 umunya Ghana Richmond Lamptey yongeye gutanga umupira mwiza kwa Ruboneka Jean Bosco nuko nawe ananirwa kuwushira mu izamu awutera ku ruhande.

Ku munota wa 86, Mugiraneza Froduard wari umaze kwinjira mu kibuga yatanze umupira imbere y'izamu rya Vision FC ariko abakinnyi ba APR FC bananirwa gushyira umupira mu izamu ngo batsinde igitego cya gatatu. 

Iminota 90 isanzwe yarangiye APR FC iyoboye umukino n'ibitego bibiri ku busa bwa Vision FC, umusifuzi yongeraho iminota ine y'inyongera nayo yarangiye nta gihindutse.

Gutsinda uyu mukino byatumye APR FC iva mu murongo utukura ijya ku mwanya wa 13 n’amanota arindwi, mu gihe Vision FC nayo itorohewe n’ibihe yo yahise ijya ku mwanya wa 14, iguma ku manota atanu.

APR FC yabonye amanota atatu iyanyotewe cyane kuko yari inagifite umujinya w’uko iherutse guterwa mpaga kubera amakosa yakoze mu mukino wayihuje na Gorilla FC igakinisha abanyamahanga 7 icyarimwe mu kibuga.

Abakinnyi babanje mu kibuga ku ruhande rwa APR FC

Abakinnyi babanje mu kibuga ku ruhande rwa Vision FC 

APR FC yabonye intsinzi ya kabiri muri shampiyona nyuma yo gutsinda ikipe ya Vision FC 

Ikipe ya APR FC yatsinze ikipe ya Vision FC