U Rwanda rwahawe amavuriro ngendanwa n’ibyuma bikonjesha imiti bifite agaciro ka miliyoni 490Frw

Ni ibikoresho bifite agaciro ka miliyoni 490Frw, bikaba byitezweho gufasha mu gukomeza kubaka ubushobozi mu rwego rw’ubuzima no kwegereza abaturage serivisi z’ubuvuzi.

RBC itangaza ko aya mavuriro ngendanwa azafasha mu kugeza serivisi z’ubuvuzi mu turere twa kure cyane, bikaba bishimangira gahunda y'u Rwanda yo kwagura no kugeza ibikorwa byo gukingira indwara zitandukanye zisanzwe zikingirwa mu gihugu hose.

Ibi bikoresho byatanzwe n’Ibitaro bya Kaminuza ya Aga Khan ku nkunga ya Banki Itsura Amajyambere y’u Budage, KFW.

Ibi bibaye nyuma y’iminsi micye Leta y’u Rwanda ishyikirije Umuryango wa Afurika Yunze Ubumwe, inyubako izakoreramo Icyicaro Gikuru cy’Ikigo Nyafurika Gishinzwe Imiti, African Medicines Agency (AMA). 

Muri icyo gikorwa, Minisitiri w’Ubuzima, Dr Nsanzimana Sabin, yavuze ko iki kigo kije gikenewe muri Afurika kuko kizajya gikurikirana ibijyanye no gukora ndetse no gucuruza imiti. 

Yongeyeho ko mu Rwanda by’umwihariko kizafasha muri gahunda rwatangiye yo kuba igicumbi cya serivisi z’ubuzima, ubushakashatsi n’ubuziranenge bw’imiti muri Afurika.

U Rwanda rwahawe amavuriro agendanwa n'ibyuma bikonjesha imiti n'inkingo

Ni ibikoresho bifite agaciro ka miliyoni 490Frw