Yatwijeje kudufasha- Abanyamideli bakomeye nyuma y’ibiganiro na Minisitiri Utumatwishima-AMAFOTO

Kuri uyu wa Kane tariki 31 Ukwakira 2024, nibwo Minisitiri Utumatwishima yakiriye aba banyamideli mu rugendo rushamikiye ku birori by’imideli byitwa ‘The Stage Fashion Showcase’ bizaba kuri uyu wa Gatanu tariki ya 1 Ugushyingo 2024 kuri Mundi Center.  Baganiriye ku iterambere ry’uruganda rw’imideli mu Rwanda, banamubwira aho bageze imyiteguro y’iki gikorwa.

Mu kiganiro cyihariye na InyaRwanda, Sandrine Mucyo utegura ibirori bya ‘The Stage Fashion Showcase’ yavuze ko bishimiye kugirana ibiganiro na Minisitiri Utumatwishima kugirango yumve impamvu z’ibi birori ndetse n’imbogamizi bahura nazo muri iki gihe.

Ati "Twaganiriye kuri ibi birori by'imideli turi gutegura, rero nabimusangizagayo kuko ni nacyo cyari cyatumye duhura, ariko twanagerageje kumubwira ibibazo tugenda duhura nabyo, yaba ari muri uru rugendo rwacu rwo kumurika imideli, twaganiriye byinshi."    

Yavuze ko agihura n'imbogamizi mu itegurwa ry'ibi birori, ariko bitewe n'intego yihaye ajya kubitangira bituma adacika intege. Ati "Ukomeza gushora kugirango abantu babyumve. Niyo mpamvu ubona abantu bagera aho bakabivamo, ariko barakubwira ngo ikintu cyose iyo ugikora ugikunze uragikora kuzagera igihe bikunze. Njye ibyo nizereramo."

Sandrine Mucyo yavuze ko nyuma y’ibiganiro na Minisitiri Utumatwishima “yatwijeje ko nka Minisiteri bazaduha ubufasha bwose bushoboka.” 

Abajijwe niba Minisiteri izabashyigikira bijyanye no kuba amafaranga cyangwa ibindi, Sandrine yasubije ati “Amafaranga biba ari ibintu birebire, nka gutya ugize amahirwe ukabona umuntu uhita akubwira ati reka nishyure abanyamideli bose wakoresheje urumva aba ahise agufasha akakwishyura ikintu nk’icyo."

Ibi birori asanzwe ategurwa, bitangirwa ibihembo ku banyamideli babiri bahize abandi. Ndetse binarangwa n’aho abanyamideli bamurika imyambaro inyuranye.

Umunyamideli ukomeye wamenyekanye nka Franco Kabano [Ubanza iburyo) amaze igihe ashyigikira Sandrine mu gutegura ibi birori