Imigabo n'imigambi y'Umutoza mushya w'u Bwongereza

Ku munsi w'ejo ku wa Kabiri nibwo byatangajwe ko Thomas Tuchel  ukomoka mu Budage yamaze kumvikana n'ishyirahamwe ry'umupira w'amaguru mu Bwongereza,FA ko ariwe ugomba gutoza ikipe y'igihugu asimbuye Gareth Southgate wavuye kuri izi nshingano nyuma yo gutsindirwa ku mukino wa nyuma wa Euro ya 2024.

Kuri uyu wa  Gatatu nibwo aya makuru yaje kuba impampo, ikipe y'igihugu y'u Bwongereza itangaza ko uyu mugabo ukomoka mu Budage ariwe mutoza wayo mu gihe kingana n'amezi 18 ari imbere.

Nyuma yo gutangazwa,Thomas Tuchel yagiranye ikiganiro n'itangazamakuru agira byinshi atangaza.

Yasubije abafana bumva ko buri igihe ikipe y'igihugu y'u Bwongereza buri gihe ikwiye kujya itozwa n'Umwongereza, avuga ko abo bafana bakwiye kumva ishyaka rye kuri Premier League n'uburyo akunda gukorera akazi ke mu Bwongereza. 

Ati"Mumbabarire, mfite Pasiporo   y'u Budage ariko abo bafana bose bakwiye kumva ishyaka ryanjye muri Premier League y'u Bwongereza, uko nkunda gukorera hano ndetse uko nkunda gutura hano.Nizeye ko nzanshobora kubemeza uko nishimiye kuba umutoza w'u Bwongereza".

Yakomeje avuga ko atewe ishema no kuba umutoza w'u Bwongereza ndetse ko ashaka gutwarana nayo igikombe cy'Isi cya 2 agashyiraho inyenyeri ya 2.

Ati" Nishimiye kuba hano.Nishimiye guhagararira u Bwongereza. Ndashaka gushyira inyenyeri ya Kabiri kuri iyi shati.Tuzakora cyane dufite intego zikomeye mu mupira w'amaguru, ibituma inzozi zacu zizasohora mu gikombe cy'Isi cya 2026”.

Yavuze ko kandi yiteguye guhangana ndetse anavuga ko igitutu kivuka gusa igihe ibintu bitari kugenda neza.Ati" Niteguye guhangana mu buryo bukomeye, ndi hano ku bw'iki gikorwa,ndi hano amezi 18, ndi kumwe n'iri tsinda kandi nkaba ndi umwe mu bagize iri shyirahamwe ritangaje.

Izi nizo mpamvu zose zo gusimbuka. Igitutu ku ruhande rwawe, igitutu cy'itangazamakuru gishobora kuvuka mu gihe ibintu bitagenze neza".

Thomas Tuchel wabaye umutoza wa Gatatu utari Umwongereza utoje ikipe y'igihugu y'u Bwongereza, nyuma ya Sven-Goran Eriksson na Fabio Capello, yiyemeje kwegukana igikombe cy'Isi cya 2026 nyuma yicyo batwaye mu 1966.

Thomas Tuchel yavuze ko ashaka gutwara igikombe cy'Isi cya Kabiri ku ikipe y'igihugu y'u Bwongereza