Ikipe ya REG W BBC yatsinze APR W BBC amanota 82-66 mu mukino wa gatatu mu ya nyuma ya Kamarampaka za Shampiyona ya Basketball mu Bagore, itangira gukoza imitwe y'intoki ku gikombe dore ko ari intsinzi ya gatatu yabonye muri iyi mikino.
Ni umukino wabaye kuri uyu wa Gatatu, tariki 9 Ukwakira 2024 muri Petit Stade i Remera. Uyu mukino ikipe ya APR W BBC yagiye kuwukina ibizi ko isabwa gutsinda dore ko imikino 2 ibanza yari yarayitsinzwe.
Uyu mukino watangiye ikipe ya APR WBC ubona yakaniye iri hejuru binyuze ku bakinnyi bayo barimo Kamba Diakite.
Ntabwo ibi byatinze kuko nyuma y'iminota 4 ikipe ya REG W BBC yahise yinjira mu mukino bidatinze ndetse iba ari na byo itangira kuyobora umukino ibifashijwemo n"abarimo Victoria Reynolds na Philoxy Destiney Promise bakoraga amanota yiganjemo 3.
Agace ka mbere karangiye ikipe ya REG W BBC iyoboye n'amanota 24 kuri 13 ya APR W BBC. Agace ka Kabiri na ko kaje n'ubundi APR W BBC isa nk'iyongeye kunguka dore ko umukinnyi wayo Kamba Diakite yahise akora amanota 4 yihuse.
Abakinnyi ba REG W BBC barimo Micomyiza Rosine na Philoxy Destiney ntabwo bigeze borohera APR W BBC bijyanye n'amanota bakoraga.
Muri aka gace ikipe y'Ingabo z'igihugu mu mukino wa Basketball niyo yinjiye amanota menshi agera kuri 24-17 ariko n'ubundi REG W BBC ikomeza kuba imbere n'amanota 41-37.
Agace ka gatatu kaje ikipe ya APR W BBC ubona ikora amakosa yiganjemo ayo gutakaza imipira bya hato na hato maze Ikipe ya Sosiyete y’Igihugu Ishinzwe Ingufu ikabibyaza umusaruro ishyiramo ikinyuranyo cy'amanota menshi binyuze ku bakinnyi bayo barimo King Kristina Morgan.
Aka gace karangiye REG W BBC iri imbere n'amanota 60 kuri 50 ya APR W BBC. Mu gace ka Kane ari nako kanyuma APR W BBC yaje iri hejuru dore ko mu minota 3 gusa hari hamaze gusigaramo ikinyuranyo cy'amanota 5 gusa binyuze ku bakinnyi nka Diakite Kamba.
Ikipe ya REG W BBC nta gutinda yaje kongera kwisuganya maze abakinnyi bayo barimo Micomyiza Rosine uzwi nk'umwamikazi w'amanota 3 na King Kristina Morgan bakora akazi batsinda amanota yiganjemo 3. Umukino warangiye ikipe ya REG W BBC itsinze amanota 82 kuri 66 ya APR W BBC ihita itangira gusatira igikombe.
Iyi kipe imaze gutsinda imikino 3 ikaba isigaje gutsinda umukino umwe ubundi igatwara ibikombe.
Umukino wa Kane hagati y'aya makipe yombi utegerejwe kuri uyu wa Gatanu taliki ya 11 Ukwakira 2024.
Ikipe ya APR W BBC yatsinzwe na REG W BBC umukino wa gatatu
Eng
RSS 
TANGA IGITECYEREZO