Tombola ya CHAN 2024 yongereye umurindi w'isubikwa ry'umukino wa Rayon Sports na APR FC

Hamaze iminsi hibazwa niba umukino w'ikirarane cyo ku munsi wa Gatatu wa Shampiyona y'icyiciro cya Mbere mu Rwanda ikipe ya Rayon Sports yagombaga kuzakiramo APR FC kuri tariki ya 19 z'uku kwezi kw'Ukwakira uzaba.

Ni nyuma y'uko ikipe y'Ingabo z'igihugu yari yanditse isaba ko yakina ibirarane byayo uko imikino ikurikirana ku ngengabihe ya Shampiyona ya 2024/25 bityo bikaba byari byavuzwe aho gukina na Rayon Sports ahubwo yazakina na Gasogi United.

Kuri ubu amahirwe y'uko umukino Rayon Sports izakiramo APR FC muri Stade Amahoro akomeje kuyoyoka nyuma ya tombora y'imikino yo gushaka itike y'imikino ya Shampiyona Nyafurika ihuza amakipe y’ibihugu y’abakinnyi bakina imbere muri za Shampiyona zabo (CHAN 2024) yabaye kuri uyu wa Gatanu tariki ya 9 Ukwakira 2024.

U Rwanda rwatomboye kuzakina n'ikipe y'igihugu ya Djibouti mu ijonjora ry'ibanze ryo gushaka itike y'iri rushanwa. Amavubi azabanza kwakirwa na Djibouti hagati ya tariki ya 25-27 Ukwakira 2024.

Bivuze ko nibura ikipe y'igihugu y'u Rwanda, Amavubi izatangira kwitegura uyu mukino mbere ya tariki 19 nk'uko biri kugenda muri iyi minsi dore ko nibura abakinnyi basigaye bagera mu mwiherero mbere y'iminsi 10 ngo umukino ukinwe.

Bivuze ko umukino wa Rayon Sports na APR FC wo waba utagikinwe. Biteganyijwe ko ku wa Gatanu w'iki Cyumweru aribwo Rwanda Premier League izaterana ikiga ku busabe bwari bwatanzwe na APR FC ko uyu mukino w'ikirarane w'Umunsi wa Gatatu wa Shampiyona utaba ku wa 19 Ukwakira, ahubwo hagakurikizwa uko ingengabihe ikurikirana.

Rayon Sports yagombaga kwakira APR FC ku Munsi wa Gatatu wa Shampiyona, tariki ya 14 Nzeri 2024, ariko uwo uyu mukino wimurwa n’uko iyi kipe y’Ingabo z’Igihugu yari mu Ijonjora rya Kabiri rya CAF Champions League aho yahuye na Pyramids FC kuri uwo munsi.