Atsinda ibitego 10 mu mukino umwe! Byinshi kuri Chido Obi-Martin zahabu Man United yavanye muri Arsenal

Umunya Denmark w'imyaka 16 y'amavuko Chido Obi-Martin akomeje kuvugisha benshi nyuma y'uko agaragaje ko afite ubushobozi bwo gutsinda ibitego 10 mu mukino umwe. 

Chido Obi-Martin wakuriye mu biganza byiza bya Arsenal, mu mwaka w'imikino ushize nabwo benshi bamwibazagaho kubera ubuhanga budasanzwe yari ari kugaragaza, gusa ubwo yagiraga amahirwe yo gusinya amasezerano nk'umukinnyi wabigize umwuga yasinyiye Manchester United. 

Kugurwa kwa Chido Obi-Martin ni ibintu byagoye Manchester United cyane ko akiri umukinnyi ufite imyaka 16. Kugeza ubu ntabwo biramenyekana niba azabasha kugirirwa icyizere cyo gukina mu ikipe nkuru cyane ko yakinaga mu bana batarengeje imyaka 18 ba Arsenal. 

Mu Ugushyingo 2023 Chido Obi-Martin yavugishije benshi ubwo Arsenal y'abatatengeje imyaka 18 yisasiraga Liverpool y'abatarengeje imyaka 18, ikayitsinda ibitego 14-3, muri uwo mukino Chido Obi-Martin yatsinze ibitego 10. 

Ubusanzwe Chido Obi-Martin yavukiye mu mujyi wa Copenhagen muri Denmark. Yabyawe na Mama we ukomoka muri Denmark naho papa we akaba avuka muri Nigeria. Yakandagiye bwa mbere mu Bwongereza muri 2020 ajyanywe no guconga ruhago, gusa yatangiye gukinira Arsenal muri 2022.

Urwibutso rutazibagirana Chido Obi-Martin yasigiye Arsenal, ni uko yihereranye Liverpool y'abatarengeje imyaka 18 akayitambika ibitego 10 mu mukino Arsenal yatsinze ibitego 14-3 bya Liverpool. Mu mwaka w'imikino ushize kandi muri Shampiyona y'abatatengeje imyaka 18 Chido Obi-Martin yatsinze ibitego 32 mu mikino 18.

Mu mpeshyi irangiye Chido Obi-Martin yatowe nk'umukinnyi mwiza muri UEFA ukina muri Shampiyona z'abana. Gusa Chido Obi-Martin wakiniye ikipe y'igihugu y'u Bwongereza na Denmark mu batatengeje imyaka 17, kuri ubu ari mu rungabangabo yibaza niba azakinira Ubwongereza, Nigeria cyangwa Denmark. 

Kugeza ubu Chido Obi-Martin ari mu biganza bya Elite Project Group Agency imureberera inyungu ze. Ni Kompanyi isanzwe ireberera abakinnyi bakomeye nka Folarin Balogun, Jadon Sancho, Bukayo Saka n'abandi. 

Uretse ibitego 32 Chido Obi-Martin yatsinze mu mwaka w'imikino ushize, mu myaka ibiri amaze muri Arsenal y'abato ayisigiye ibitego 49. Ikipe y'igihugu ya Denmark mu batatengeje imyaka 16 Chido Obi-Martin yayikiniye imikino umunani ayitsindira ibitego 4. 

Ikipe y'abatarengeje imyaka 17 yayikiniye imikino 19 ayitsindira ibitego 12, naho mu ikipe y'igihugu y'u Bwongereza mu batatengeje imyaka 16 yabakiniye imikino ibiri nta gitego yatsinze. 

Manchester United yamaze kugura umunya Denmark Chido Obi-Martin ufite ubushobozi bwo gutsinda ibitego 10 mu mukino umwe 

Chido Obi-Martin avuye muri Arsenal atsinze ibitego 49 

Ari muri Arsenal, Chido Obi-Martin yayifashije gutsinda Liverpool ibitego 14-3