Champions League: Arsenal yahutaje PSG, Manchester City na FC Barcelona ziranyagira

Ni mu mukino yo ku munsi wa kabiri wa UEFA Champions League yakinwe kuri uyu Wa Kabiri taliki ya 1 Ukwakira 2024.

Umukino wari ukomeye ni uwo ikipe ya Arsenal yari yakiriyemo Paris Saint-Germain kuri Emirates Stadium mu gihugu cy'u Bwongereza.

Umukino watangiye amakipe yombi akishakisha aho nta n'imwe yamaranaga umupira umwanya. Ku munota wa 8 ikipe ya Arsenal yagerageje uburyo bwa mbere imbere y'izamu ku mupira uwitwa Ricardo Calafiori yaharahaye Bukayo Saka arekura ishoti ariko rinyura hejuru y'izamu gato cyane.

Ku munota wa 19 ikipe y'abarashi yafunguye amazamu ku gitego cyari gitsinzwe na Kai Havertz akoresheje umutwe ku mupira mwiza waruzamuwe na Leandro Trossard.

Nyuma yo gutsindwa igitego cya mbere ikipe ya Paris Saint-Germain yakomeje kurushwa mu buryo bugaragara aho yari yaciriwe umurongo itemerewe kurenza umupira.

Ku munota wa 28 Paris Saint-Germain yabonye uburyo buremereye imbere y'izamu ku ishoti ryari rirekuwe na Nuno Mendes ari inyuma y'urubuga rw'amahina gusa birangira rikubise igiti cy'izamu.

Ku munota wa 35 ikipe ya Arsenal yatsinze igitego cya 2 kivuye kuri kufura yari itewe na Bukayo Saka maze abakinnyi b'iyi kipe basimbuka umupira bajijisha Gianlugigi Donnarumma birangira uminyura ku ruhande uragenda unyeganyeza inshundura.

Igice cya kabiri cyaje ikipe ya Paris Saint-Germain isatira ishaka uko yakwishyura ariko ntabwo byamaze kabiri. Ku munota wa 51 Gabriel Martinelli yaratsinze igitego habura gato ku ishoti riremereye yararekuye ariko birangira umunyezamu wa Paris Saint-Germain atabaye.

Ku munota wa 64 amakipe yombi yakoze impinduka mu kibuga aho Mike Arteta yakuyemo Thomas Partey hajyamo Mikel Merino naho Luis Enrique we akuramo Vitinha na Desire Doue hajyamo Randal Kolo Muani na Fabian Luiz.

Mu minota 70 ikipe ya Paris Saint-Germain yasatiriye cyane gusa abakinnyi bayo barimo Randal Kolo Muani na Bradley Barcola bananirwa kubyaza umusaruro amahirwe babonaga.

Indi mikino ya UEFA Champions League yo ku munsi wa kabiri yakinwe ikipe ya Manchester City yanyagiye Slovan Bratislava ibitego 4-0,ni ibitego byatsinzwe na Ilkay Gundogan ku munota wa 8,Phil Foden ku munota wa 15 ,Erling Haaland ku munota wa 58 na MacAtee ku munota wa 74.

FC Barcelona yanyagiye Young Boys ibitego 5-0 bya Roberto Lewandowski ku munota wa 8 nuwa 51,Raphinha ku munota wa 34 ndetse, Inigo Martinez ku munota wa 37 na Camara witsinze ku munota wa 81.

Borussia Dortmund yatsinze Celtic ibitego 7-1, Inter itsinda FK Creven Zvezda ibitego 4-0,Bayer Leverkusen itsinda AC Milan 1-0 naho Sporting inganya na PSV Eindhoven 1-1.

Kai Havertz yishimira igitego yatsinze 

Bukayo Saka watsinze igitego cya 2 cya Arsenal