Andres Iniesta yatangaje itariki yo gusezera ruhago

Andres Iniesta yafashe icyemezo cyo guzesera kuri ruhago ku myaka 40 y'amavuko nyuma y'uko guhera muri Nyakanga yanze kongera amasezerano mu ikipe ya Emirates Club yo muri Leta Zunze Ubumwe z'Abarabu.

Ibinyamakuru Relevo na The Sun dukesha iyi nkuru, byanditse ko nubwo Andres Iniesta yatangaje ibyo kureka ruhago, umunsi nyamukuru wo kumanika inkweto ni itariki 8, Ukwakira 2024.

Uyu munya-Esipagne watsinze igitego cyatumye Espagne itwara igikombe Cy'Isi cya 2010 yabonye, abinyujije ku mbuga nkoranyambaga ze, atangaza ko mu minsi mike ku itariki 8, 10, 2024 amakina inkweto.

Impamvu nyamukuru yatumye Andres Iniesta ahitamo iyo tariki,yavuze ko uwo munsi uhuye na nimero 8, 10 na 24 yambayeho mu makipe yagiye akinira.

Ibihe by'ingenzi bya Andres Iniesta mu mupira w'amaguru yabigiriye muri FC Barcelona. Yayikiniye imikino 674, ayitsindira ibitego 57, atanga imipira 135 yavuyemo ibitego.

Akinira FC Barcelona, Andres Iniesta yatwaranye nayo ibikombe 37, byiganjemo ibikombe 9 bya Shampiyona ya Espagne Laliga Santander, UEFA Champions League Enye, Clubs World Cup 3 ndetse n'ibindi. 

Mu 2018 ubwo yafataga icyemezo cyo kuva muri FC Barcelona, Andres Iniesta yagiye muri Vissel Kobe yo mu Buyapani. Iyi kipe yayikiniye imyaka itanu, ayifasha gutwara igikombe cya Shampiyona n'igikombe cy'igihugu.

Mu 2023 nibwo Andres Iniesta yageze muri Emirates Club yo muri Leta Zunze Ubumwe z'Abarabu, aho yayikiniye imikino 23, ayitsindira ibitego bitanu ndetse atanga umupira wavuyemo igitego. 

Mu ikipe y'igihugu ya Espagne Andres Iniesta yakinnye imikino 131, ayitsindira ibitego 14, harimo igitego yatsinze ku mukino wa nyuma w'igikombe cy'Isi cya 2010. 

Uretse gutwara igikombe Cy'Isi cya 2010, Andres Iniesta yafashije Espagne gutwara Euro inshuro ebyiri. 

Andres Iniesta yabaye umukinnyi w'akataraboneka muri FC Barcelona 

Iniesta yatsinze igitego cyatumye Esipagne itwara igikombe Cy'Isi cya 2010