Amb Rwamucyo yagaragaje ko amateka y'u Rwanda ashingiye ku buryo rwahagaze mu byo rwanyuzemo

Mu butumwa yatanze muri iyi Nteko Rusange yagaragaje ko umutekano muke ugaragara hirya no hino ku Isi, asaba ko hashyirwa imbere ubumwe bw’abayituye kugira ngo haboneke ituze n’iterambere rirambye.

Yifashishije amahitamo y’Abanyarwanda nyuma y’amateka mabi ya Jenoside yakorewe Abatutsi mu 1994, Rwamucyo yavuze ko igikenewe atari ugukora amahitamo ashoboka ahubwo ko ari ugukora amahitamo akwiye ku bw’inyungu rusange.

Ati: “U Rwanda ruzi neza ingaruka z’ivangura kuri sosiyete, bitari gusa ku muryango mugari w’ibihugu. Nyuma y’amateka mabi ya Jenoside yakorewe Abatutsi mu 1994, twisanze aho bitugoye, duhitamo ubumwe kuruta ivangura ku bwo kubaho kwacu. Aya mahitamo ntiyari yoroshye ariko yari akwiye, ndetse afasha kubaka u Rwanda rwa nyuma ya jenoside. Isi, magingo aya, nayo ihagaze ahayigoye nk’aho u Rwanda rwari ruri.”

Amb. Rwamucyo kandi yagaragaje ko aya mahitamo y’Abanyarwanda atari mu nyungu zabo gusa ahubwo n’Akarere rutuyemo ndetse n’Umugabane wa Afurika, aho rugira uruhare mu bikorwa byo kugarura amahoro hirya no hino muri Afurika ndetse no ku Isi binyuze muri Loni.

Nubwo bimeze bityo, hirya no hino ku Isi ndetse no ku Mugabane wa Afurika, haracyagaragara ibibazo by’umutekano muke n’intambara zitwara ubuzima bw’abatari bake.

U Rwanda rwijeje ko ruzakomeza gutanga umusanzu warwo mu bufatanye n’ibihugu byose mu kubaka iterambere rusange ry’Isi.