Ikipe y'igihugu y'u Bwongereza yasezereye iy'u Busuwisi kuri penariti yerekeza muri 1/2 mu irushanwa rihuza amakipe y'ibihugu yo ku mugabane w'Iburayi rya Euro ya 2024 riri kubera mu Budage.
Ni mu mukino wa 1/4 wakinwe kuri uyu Wa Gatandatu Saa kumi n'ebyiri ubera kuri Merkur Spiel Arena.
Umukino watangiye ikipe y'igihugu y'u Bwongereza ihererekanya neza ndetse n'abakinnyi bayo barimo Declan Rice na Bukayo Saka, bagerageza amahirwe ariko abasore ba Switzerland bakomeza kuba ibamba.
Ku munota wa 20 uwitwa Phil Foden yahaye umupira Bukayo Saka nawe awuhindura ashaka Harry Kane gusa birangira Fabian Schar atabaye awukuraho.
Ikipe y'igihugu y'Ubusuwisi nayo yagiye inyuzamo ikagera imbere y'izamu ikoresheje uburyo bwo kwirunkana imipira ariko bikarangira abarimo Breel Embolo batabyaje amahirwe umusaruro.
Mbere yuko igice cya mbere ikipe y'igihugu y'u Bwongereza yarase uburyo buremereye ku mupira Bukayo Saka yarahaye Kobbie Mainoo nawe arekuramo ishoti ariko birangira Granit Xhaka ashyize umupira muri koroneri.
Amakipe yombi yagiye kuruhuka bikiri 0-0. Mu gice cya kabiri nabwo ikipe y'igihugu y'u Bwongereza yaje ikomeza guhererekanya neza gusa yagera imbere y'izamu ikabura aho kumenera.
Ku munota wa 57 myugariro w'Ubusuwisi, Ricardo Rodriguez yahinduye umupira mwiza maze rutahizamu Breel Embolo ashyiraho umutwe ariko birangira Jordan Pickford aratabara afata umupira.
Bigeze ku munota wa 76 ikipe y'igihugu y'Ubusuwisi yafunguye amazamu ku mupira waruhinduwe na Dan Ndoye maze uwitwa Breel Embolo aca mu rihumye Kayle Walker ahita atereka umupira mu nshundura.
Nyuma yo gutsindwa umutoza w'u Bwongereza, Gareth Southgate yahise akora impinduka mu kibuga akuramo Kobbie Mainoo Kieran Trippier na Ezri Konsa ashyiramo Luke Shaw, Eberechi Eze na Cole Palmer.
Ku munota wa 80 Intare 3 nkuko batazira ikipe y'igihugu y'u Bwongereza yahise ibona igitego cyo kwishyura gitsinzwe na Bukayo Saka ku mupira yarahawe na Declan Rice.
Iminota 90 y'umukino yarangiye amakipe yombi anganya igitego 1-1 bituma hitabazwa iminota 30 y'inyongera, kugira ngo hamenyekane ikipe ikomeza muri 1/2.
Iyi minota nayo yarangiye rwabuze gica bituma hitabazwa penariti, maze ikipe y'igihugu y'u Bwongereza yinjiza 4 kuri 3 z'Ubusuwisi, ihita yerekeza muri 1/2 .
Penariti z'u Bwongereza zatewe na Cole Palmer arayinjiza, Jude Bellingham arayinjiza, Bukayo Saka arayinjiza , Ivan Toney arayinjiza na Trent Alexander Arnold arayinjiza.
Penariti z'Ubusuwisi zatewe na Emmanuel Akanji arayirata, Fabian Schar arayinjiza, Xherdan Shaqiri arayinjiza naho Zeki Amdouni arayinjiza.
Eng
RSS 
TANGA IGITECYEREZO