Umutoza w'ikipe ya FC Barcelona yashinje umusifuzi kwangiza ibyo bari barateguye byose muri uyu mwaka w'imikino nyuma yo gusezererwa na Paris Saint-Germain muri Champions League.
Kuwa Kabiri ni bwo hakomezaga imikino yo kwishyura ya 1/4 cya UEFA Champions League. Kuri Estadio Olimpico Lluis Companys, ikipe ya FC Barcelona yo muri Espagne yari yakiriye Paris Saint-Germain yo mu Bufaransa. Benshi batekerezaga ko uyu mukino usa nk'uwarangiye bitewe n'uko ubanza FC Barcelona yari yatsindite kuri Parc de Princes ibitego 3-2.
Ikipe ya FC Barcelona isanzwe ifite ibikombe 5 bya Champions League yaje no kubanza igitego gitsinzwe na Raphinha ku munota wa 12 gusa nyuma Paris Saint-Germain iza kuyisubirana inyuma irishyura iranatsinda ku bitego bya Ousmane Dembele ku munota wa 40, Vitinha kuwa 54, Kylian Mbappé kuwa 61 ndetse no kuwa 89.
Umukino warangiye Paris Saint-Germain itsinze ibitego 4-1 ihita iyisezerera ku kinyuranyo cy'ibitego 6-4 muri rusange.
Muri uyu mukino ariko kugira FC Barcelona itsindwe, byasabye ko umukinnyi wayo Ronald Araujo ahabwa ikarita y'umutuku mu ikosa yakoreye Barcola ndetse na Xavi Hernandez nawe arayihabwa kubera kutishimira ibyemezo by'umusifuzi.
Nyuma y'uyu mukino mu kiganiro n'itangazamakuru, uyu mutoza yatangaje ko impamvu bazerewe ari ukubera uyu musifuzi utabasifuriye neza.
Ati: "Birababaje, tuvuye muri Champions League kubera amakosa y'umusifuzi. Ndatekereza ko ibyabaye kuri Araujo byafashe umwanzuro ku gutsindwa. Ibyo twakoze uyu mwaka wose w'imikino byangijwe n'icyemezo cyumusifuzi. Nari nabwiye umusifuzi ko yabaye icyago kuri twe kandi niko kuri".
Gusezererwa kwa FC Barcelona muri Champions League bivuze ko umwaka ushobora kurangira nta gikombe na kimwe batwaye kubera ko no muri shampiyona bisa nk'aho Real Madrid yamaze kuyegukana nubwo ku Cyumweru hari umukino ugomba kubahuza.
Umutoza wa FC Barcelona yinubiye ibyemezo by'umusifuzi
Eng
RSS 
TANGA IGITECYEREZO