AFCON: Cameroon yakatishirije mu nyongera naho Senegal ya Sadio Mane ihitana amanota yose

Kuri uyu  wa Kabiri saa Moya z'umugoroba  nibwo hakinwe imikino yo ku munsi wa nyuma wo mu itsinda C mu mikino y'igikombe cy'Afurika kiri kubera muri Cote D'Ivoire.

Kuri Stade de la Paix ikipe y'igihugu ya Cameroon yakinaga na Gambia. Cameroon itari yifashishije Umunyezamu wa Manchester United,Onana yagombaga gutsinda uyu mukino kugira ngo ibone itike ndetse biza no kurangira ibigizego nubwo byari bigoranye itsinda ibitego 3-2.

Ku munota wa 56 Toko Ekambi yafunguye amazamu ahawe umupira na Georges Kevin N'Koudou ariko ku wa 72 Ablie Jallow wa Gambia ahita yishyura ku mupira yari ahawe na Alieu Fadera.

Ku munota wa 85 Ebrima Colley yaje gutsindira ikipe y'igihugu ya Gambia igitego cya 2 ariko nyuma y'iminota 2 gusa myugariro James Gomes ahita yitsinda Cameroon iba ibonye igitego cya 2 gutyo.

Umukino waje kongerwaho iminota 7 y'inyongera maze ku wa 1 Christopher Wooh ahita atsinda igitego cya 3 cya Cameroon biza no kurangira gutyo bakatishije itike ya 1/8 batsinze ibitego 3-2.

Kuri Stade Charles Konan Banny, ikipe y'igihugu ya Senegal yo yari yaramaze gukatisha itike ya 1/8 yakinaga n'ikipe y'igihugu ya Guinea ariko n'ubundi ntiyabuze kuyitsinda ibitego 2-0 ubundi izamukana amanota yayo yose 9.

Ni ibitego byatsinzwe na Abdoulaye Seck ku munota wa 61 akoresheje umutwe kuri kufura yarizamuwe neza na Krepin Diatta ndetse na Iliman Ndiaye ku mupira yari ahawe na Sadio Mane ku munota wa 90+2.

Muri iri tsinda C ikipe y'igihugu ya Senegal yakomeje ari iya mbere n'amanota 9, Cameroon ari iya 2 n'amanota 4 inganya na Guinea izazamuka nk'ikipe yatsinzwe neza.

Senegal yakomezanyije amanota yose 9

Ikipe y'igihugu ya Cameroon yakatishije itike ya 1/8 mu minota y'inyongera