Ahabanza Imikino

Scott Mc Tominay yatangaye amagambo ahumuriza Eric Ten Hag

Yanditswe na: ISHIMWE Walter
Taliki:12/12/2023 11:52 0

Umunya Scotland ukinira Manchester United mu kibuga hagati Scott Mc Tominay, yatangeje ko abakinnyi bose bari inyuma ya Eric Ten Hag, nubwo ikipe itorohewe.

Ku wa Gatandatu, Manchester United yatsinzwe na Bournemouth ibitego bitatu ku busa, iba intsinzwi ya 11 iyi kipe igize mu mikino 23 imaze gukina muri uyu mwaka w'imikino.

Kuri uyu wa Kabiri nta yandi mahitamo Manchester United ifite, uretse gutsinda FC Bayern Munich, ikizera ko izaguma muri UEFA Champions League cyangwa igakina Europa League. Bitabaye ibyo Man United yahita itaha nta nkuru.

Scott Mc Tominay umaze iminsi yitangira Manchester United, yatangaje ko baza kwitanga bikomeye mu mukino wa Bayern Munich. Yagize ati "Mbere na mbere inshingano zikomeye, ziri ku mitwe yacu Abakinnyi.

Manchester United yamye igira abakinnyi beza, gusa ndabizeza ko n'abahari atari agafu k'imvugwarimwe. Turabizi ko abantu bavuga ko hari umubano mubi hagati y'umutoza n'abakinnyi. Gusa icyo batazi ni uko umutoza ari we nshuti yacu ikomeye.

Itsinda ry'abatoza ba Man United ni ryiza kugeza ubu. Ku mukino wa Bayern Munich turaza gukora nk' ikipe Kandi turaza gushyira hamwe."

Scott Mc Tominay usigaye ahetse Manchester United, yayigezemo muri 2017 aguzwe na Felix Jose Maurinho. Uyu mukinnyi niwe wibasiye Chelsea, ubwo United yayitsindaga ibitego bibiri kuri kimwe.

Kuva Manchester United yatandukana na Sir Alex Ferguson, abakinnyi bayikinira ntabwo bashinjwa ubuswa, ahubwo bashinjwa kutagaragaza umutima wo kwitanga. Ibi byagiye bigarukwaho n'abatoza basimbuye Sir Alex Ferguson. Abo ni David Moyes, Louis van Gaal, Mourinho Jose Felix, Ole Gunnar Solskjaer na Ralf Rangnick.

Ole Gunnar wahoze atoza iyi kipe, mu kiganiro yagiranye na BBC Sports muri Nzeri, yagarutse ku bakinnyi ba Manchester United, avuga ko kubatoza bisaba umutima wo kwihangana dore ko nta bwitange bakigira.

Ubu Manchester United ni iya gatandatu muri English Premier League, ni iya nyuna mu itsinda A muri UEFA Champions League. Manchester United irasabwa gutsinda Bayern Munich, ubundi igategereza ikiva hagati ya FC Copenhagen na Garatasaray, kugira ngo imenye icyerekezo.