Ahabanza Imikino

Premier League: Arsenal yikuye kwa Luton Town icyuya cyaje

Yanditswe na: Aloys Niyonyungu
Taliki:6/12/2023 0:57 0

Ikipe ya Arsenal yatsinze Luton Town bigoranye mu mikino yo ku munsi wa 15 wa shampiyona y'icyiciro cya mbere mu Bwongereza.

Ni umukino wabaye kuri uyu wa kabiri saa yine n'iminota 15 z'ijoro ku kibuga cya Luton, Kenilworth Road.

Ikipe ya Arsenal yatangiye iri hejuru abasore bayo bahererekanya umupira neza ndetse banasatira cyane.

Ku munota wa 20 bahise bafungura amazamu ku gitego cyatsinzwe na Gabriel Martinelli ku mupira yahawe na Bukayo Saka

Nyuma y'iminota 5 gusa Lutton Town yabonye igitego cyo kwishyura ku mupira wari uvuye muri koroneri itewe na Alfie Doughty maze Gabriel Osho ashyiraho umutwe umupira uragenda ujya mu nshundura.

Ikipe ya Arsenal nubwo yishyuwe ariko ntibyayibujije kugumya kwiharira umupira ndetse abakinnyi bayo barimo Bukayo Saka bakagerageza gushota.

Igice cya mbere kigiye kurangira iyi kipe y'abarashi yabonye igitego cya 2 gitsinzwe na Gabriel Jesus ku mupira wahinduwe na Ben White.

Mu gice cya kabiri ikipe ya Luton Town yaje yishyura ku munota wa 49 ku gitego cyatsinzwe na Elijah Adebayo ku mupira wavuye muri koroneri nanone.

Kuwa 57 Luton Town yabonye igitego cya 3 gitsinzwe na Ross Barkley ku ishoti riremeye yarekuye. Bidatinze nyuma y'iminota 3 gusa ikipe ya Arsenal yahise yishyura ku gitego cya Kai Havertz ahawe umupira na Gabriel Jesus.

Ikipe ya Arsenal yakomeje gukina ishaka igitego cy'intsinzi bigatuma ba myugariro ba Luton Town bakina barwana no gukiza izamu gusa.

Umukino ubura amasegonda ngo urangire Arsenal yabonye igitego cya 4 gitsinzwe na Declan Rice ku mupira wazamuwe neza na Martin Odegaard, iba itahanye ibonye amanota 3 agoranye.

Ku rutonde rw'agateganyo rwa shampiyona y'u Bwongereza, Arsenal niyo iri ku mwanya wa mbere n'amanota 36 mu mikino 15, igakurikirwa na Liverpool ifite amanota 31 mu mikino 14. Manchester City iri ku mwanya wa 3 n'amanota 30 mu mikino 14.