Ahabanza Hanze

Michelle Obama yahishuye ko yarize iminota 30 ubwo Donald Trump yarahiraga

Yanditswe na: Nadia Kangabe
Taliki:8/03/2023 12:54 0

Michelle Obama yashishuye ko yananiwe kwihangana maze akarira iminota 30 yose ubwo yasezeraga muri White House ku munsi Donald Trump yarahiriraga kuyobora Leta Zunze Ubumwe za Amerika.

Michelle LaVaughn Robinson Obama ni umunyamategeko akaba n'umwanditsi w'ibitabo wanabaye 'First Lady' wa Leta Zunze Ubumwe za Amerika kuva mu 2009 kugeza mu 2017 ubwo umugabo we Barack Obama yasimburwaga na Donald Trump.

Michelle Obama wabaye umwiraburakazi wa mbere mu mateka wabaye kuri uyu mwanya, yahishuye ko yananiwe kwihangana agasuka amarira iminota 30 ubwo yuriraga bwa nyuma indege ya ‘Air Force One’ ku wa 20 Mutarama 2017, umugabo we asimbuwe na Donald Trump wari umaze kurahirira kuba Perezida.

Ibi byamenyekanye kuwa 07/03/2023 ubwo yari muri gahunda yo kwamamaza igitabo cye cya gatatu yise ‘The Light We Carry’, kigaruka ku mubano we n’abandi, ibyamubujije amahwemo n’ibindi.

Michelle Obama yavuze ko nyuma yo kurahira kwa Donald Trump, yasutse amarira menshi gusa atari ukubera irahira ry'uyu muherwe, ahubwo ko ari ukubera impamvu zitandukanye zazamuye amarangamutima ye.

Yagize ati: ''Twari tuvuye mu rugo twari tumazemo imyaka umunani, urugo rukumbi abana bacu bari bazi neza. Bibukaga Chicago ariko igihe kinini bakimaze muri White House kurenza ahandi. Twasezeraga abakozi n’abandi bose babareze".

Michelle Obama abajijwe uko byari bimeze kurira Air Force One bwa nyuma, yavuze ko byari amarira gusa. Ati "Byari amarira, hari ayo marangamutima. Ubwo iriya miryango yafungwaga, narize iminota 30 ubudatuza, ntabasha kubigenzura kubera uko twabanaga mu myaka umunani".

Michelle Obama yakomeje avuga ko yibuka neza umunsi Donald Trump yarahiriyeho kuko wari umunsi udasanzwe kuri we kuko ari wo munsi we n'umuryango we basezeye White House. Yavuze ko ibyabaye uyu munsi n'iyo abyibutse bimutera ikiniga.

Ibi byose bitangaje byabaye kuri Michelle Obama n'umuryango we kuwa 20 Mutarama 2017 ubwo Trump yasimburaga umugabo we Barack Obama, yabisohoye mu gitabo cye 'The Light We Carry' aherutse gusohora.