Miss Muyango yinjiye mu itangazamakuru asimbuye Bianca kuri Isibo TV

Ku gicamunsi cyo kuri uyu wa Kane tariki 5 Mutarama 2023, Bianca yanditse kuri konti ye ya Instagram avuga ko “Guhera ku itariki ya mbere ya Mutarama 2023, ntakiri umukozi wa Isibo Tv.”

Imyaka ibiri yari ishize uyu mukobwa akorera iki gitangazamakuru cyibanda cyane ku makuru y’ibyamamare mu Rwanda, muri Afurika no ku Isi yose muri rusange.

Yatangiye kugaragara kuri Isibo Tv kuva muri Gashyantare 2020 binyuze mu kiganiro ‘Takeover’ yakoranaga n’abarimo Mc Buryohe n’abandi. We na MC Buryohe barahuzaga cyane binyuze mu biganiro bakoraga kuri Flash TV mbere yo kwerekeza kuri Isibo Tv.

Bianca yabwiye InyaRwanda ko ari mu biganiro n’ikindi gitangazamakuru agiye kwerekezaho mu minsi iri imbere.

Mu gihe cy’imyaka ibiri yari ahamaze, yagize uruhare mu gutegura no gutunganya ibiganiro bitandukanye, kandi ni umwe mu bagiraga uruhare mu bihembo bya The Choice Awards bigiye gutangwa ku nshuro ya Gatatu. 

InyaRwanda ifite amakuru yizewe avuga ko Uwase Muyango Claudine wavuzwe cyane nyuma yo kuva muri Miss Rwanda 2019 yegukanye ikamba, atangira kugaragara ku nyakiramashusho za Televiziyo Isibo Tv.

Biteganyijwe ko ku Cyumweru tariki 8 Mutarama 2023, binyuze mu kiganiro ‘The Choice Live’ gikorwa n’abarimo Phil Peter, Muyango azakirwa kumugaragaro.

Ni mu gihe guhera kuri uyu wa Gatanu, hatangira gusohoka amafoto agaragaza ko uyu mugore agiye gutangira gukorera Isibo TV nk’umunyamakuru, binyuze mu kiganiro ‘Takeover’.

Muyango aherutse kuyobora igitaramo cy’abanyarwenya Zuby Comedy cyabereye muri Kigali Conference and Exhibition Village ahazwi nka Camp Kigali.

Muri iki gihe, ari kwifashishwa cyane mu kuyobora ibirori bibera mu tubari n’utubyiniro dutandukanye.

Ni umwe mu basarura agatubutse ku mbuga nkoranyambaga, binyuze mu kwamamariza ibigo bitandukanye.

Uwase Muyango Claudine yinjiye mu itangazamakuru aho agiye kujya akora mu kiganiro ‘Takeover’ cya Isibo TV 

Bianca yamaze gutangaza ko yasezeye kuri Isibo Tv nyuma y’imyaka ibiri ayikorera 

Bianca yasabye gukomeza gushyigikirwa n’ubwo avuye kuri Isibo Tv