Miss Mutesi Jolly agiye kujya ategura Miss East Africa nyuma y'uko Rena ahagaritswe

Mutesi Jolly uri mu bavuga rikumvikana ku mbuga nkoranyambaga, asanzwe ari Visi- Perezida w’iri rushanwa riheruka kuba mu Ukuboza 2021 muri Tanzania.

InyaRwanda ifite amakuru avuga ko Mutesi Jolly afite imigabane ingana na 49% mu irushanwa rya Miss East Africa naho Rena Callist bari basanzwe bafatanya akagira imigabane ingana na 51%.

Amategeko yo muri Tanzania ateganya ko umunyagihugu agira imigabane yisumbuyeho igihe agiye gukora ubushabitsi afatanyije n’undi utari umwenegihugu.

Muri Kamena 2021, ni bwo byatangajwe ko Miss Mutesi Jolly yagizwe Visi Perezida w’iri rushanwa-Icyo gihe yanagiye muri Tanzania gushyira umukono ku masezerano y’imikoranire na Rena Callist-Kuva ubwo batangira gukorana.

Kuva ku munsi wa mbere kugeza ku munsi irushanwa ryarangiriyeho, hari ibimenyetso Mutesi Jolly yabonaga ko ishoramari yakoze ritazahita rimwungukira nk’uko yabicyekaga.

Yemeranyije n’abavuga ko abantu bose bakora ubushabitsi ‘siko bose baba bafite ubunyangamugayo’.

Mu kiganiro yagiriye ku rubuga rwa Twitter, mu ijoro ryo kuri uyu wa Gatatu tariki 26 Ukwakira 2022, uyu mukobwa yavuze ko yari yamaze kubona ko Rena adafite ubunyangamugayo muri we.

Jolly yavuze ko byahumiye ku mirari ubwo Shanitah yegukana ikamba rya Miss East Africa, bakamara ibyumweru bibiri muri Tanzania, basaba ubuyobozi ngo babafashe kugira ngo Shanitah asinye kontaro (Contract) ‘kugira ngo azahabwe ibintu bye’.

Bavuye muri Tanzania, hari icyizere cy’uko ibihembo uyu mukobwa yatsindiye azabibona ariko biranga. 

Avuga ko bagerageje inzira zose zishoboka, kugeza ubwo babona ko inzira basigaranye ari ukugana inzira y’amategeko "kugira ngo nshyire mu bikorwa inshingano zanjye nka Visi Perezida w’irushanwa ni uko Shanitah yagombaga kwemera ko turi butanga ikirego."

Yavuze ko kujya mu nkiko atari icyemezo bafashe bonyine, kuko banabigiriwemo inama n’abayobozi batandukanye, yaba abo mu Rwanda no muri Tanzania.

Uyu mukobwa yavuze ko bitewe n’ukuntu Rena Callist yatakarijwe icyizere, atemerewe kongera gutegura irushanwa rya Miss East Africa. Aho kuri ubu yamaze kwambukwa ububasha, buhabwa Miss Jolly.

Ati "Kuko nk’ubu ngubu nta n'ubwo ashobora kongera gutegura. Irushanwa ninjya no kuritegura nzaritegurana n'undi muntu kuko nta bunyangamugayo afite. ubuyobozi mu gihugu cyabo ubwabo baramuhagaritse ntabwo ashobora kongera gufatanya nanjye.”

Miss Mutesi Jolly yakomeje avuga ko Umunyana Shanitah azarega ‘Rena Events’ kuko ari yo ifite uburenganzira bwo gutegura iri rushanwa ‘kandi nyirayo ni nawe wagombaga gutanga imodoka’. 

Miss Umunyana Shanitah yatangaje ko igihe kigeze kugira ngo ajyane mu nkiko abategura Miss East Africa

Umunyana yavuze ko yagerageje inzira zose zishoboka kugira ngo ibintu bicyemuke, ariko biranga 

Byageze aho Shanitah asaba ko imodoka igurishirizwa muri Tanzania, hanyuma yohererezwe amafaranga ayigurire mu Rwanda 

Mutesi Jolly yavuze ko Shanitah azajyana mu nkiko Rena Callist

Mutesi yavuze ko yamaze guhabwa gutegura Miss East Africa. Avuga ko azishimira gutegura iri rushanwa igihe Shanitah azaba yamaze guhabwa ibihembo yatsindiye 

Jolly yavuze ko nyuma y’irushanwa ari bwo yamenye ko imodoka ya Nissan Shanitah yagombaga guhabwa itishyuwe