Apotre Mutabazi yavuze impamvu 5 Imbuto Foundation ariyo yonyine yategura neza Miss Rwanda anasabira Miss Muheto kugororerwa

Apôtre Mutabazi watanze Inama zatuma habaho imitegurire n'imigendekere myiza muri Miss Rwanda ni muntu ki?

Apôtre Mutabazi Kabarira Maurice ni Umushumba w'Itorero Kingdom Citizens rikorera ku Kinamba, Kacyiru, mu Mujyi wa Kigali. Ni Umwanditsi w'Ibitabo bisaga 40 akaba n'Umushakashatsi ku Buyobozi n'Imiyoborere. Ni Umuvugizi wa Rubanda, Umujyanama mu Miyoborere akaba n'Umusesenguzi w'Ingamba. Yaminuje mu bwubatsi muri Kaminuza y'u Rwanda mu yahoze ari KIST. Yize Tewolojiya n'Ivugabutumwa [Theology and Evangelism] muri Moore Theological College.

Apôtre Mutabazi w’imyaka 36 ni umugabo ufite umugore umwe n’abana bane, akaba amaze kwandika ibitabo bitandukanye aho icyatumye amenyekana cyane ari icyo aherutse gusohora yise "African Poverty is a Choice" bivuze ngo "Ubukene bw'Abanyafrika ni amahitamo". Ibindi bitabo yanditse harimo: “Mbese gukiranuka birashoboka wambaye umubiri?”; “Mbese gukiranuka birashoboka ucuruza?”; “Nshaka gukiranuka kandi nshaka gukira, iby’icya cumi Imana ibivugaho iki?”; ndetse n’ikitwa “Singirira umugisha wawe”.

Mu minsi ishize uyu mugabo yanditse ku mbuga nkoranyambaga ze ibyo abona byazana impinduka nziza muri Miss Rwanda kugira ngo itandukane burundu n'amanyanga n'ihohoterwa rishingiye ku gitsina riri kuyivugwamo. Atangaje ibi nyuma y'iminsi micye Perezida Paul Kagame avuze ku ihohoterwa rishingiye ku gitsina n'icuruzwa ry'abakobwa bitabira iri rushanwa. Yabigarutseho tariki 30 Mata 2022, ubwo yasozaga Inama y’Abanyamuryango ba FPR Inkotanyi yabereye muri Kigali Arena.

Perezida Kagame yaragize ati “Kubacuruza cyangwa se nabo ubwabo kubahohotera. Bikaba mu gihugu cyacu, bikatubamo, bagomba kuba abantu babizi, bagaceceka ntihagire ugira icyo abivugaho, abandi ntibabizi.” Perezida Kagame yavuze ko kuba iki kibazo cyarabaye ntikimenyekane bishobora kuba byaraturutse ku burangare bw’abayobozi cyangwa se ‘hari imico mibi twese yatwinjiyemo ku buryo ibintu nk’ibi ntacyo biba bitubwiye bishatse byaba’.

Yavuze ko abantu bashishikarizwa kwihangira imirimo, ariko ko bitumvikana ukuntu umuntu yihangiye umurimo wo ‘gucuruza abantu’. Avuga ko buri gihe yakira raporo za Polisi, zigaragaza abantu batwawe hanze bagiye gucuruzwa hanze no mu Bushinwa barimo abahungu n’abakobwa. Yavuze ko umuntu wakorewe ihohoterwa akwiye gutinyuka agatera intambwe ya mbere akavuga maze amategeko akamurenganura.

Madamu Jeannette Kagame aherutse guhura na ba Nyampinga b'u Rwanda barindwi, Ibisonga byabo n'Abandi bitabiriye Miss Rwanda 2022. Yavuze ko yatekereje kuganira nabo kubera imbaraga nabo bashyizemo mu guharanira kugera ku nzozi zabo. Yababwiye ko igihugu kibitezeho byinshi bityo ko bakwiye guharanira kubaka ejo habo heza n'ah'igihugu, bakagiteza imbere ndetse bakakibwira amahanga. Yabwiye ko ari bo bafite urufunguzo rw'inzozi bifuza kugeraho.

Apotre Mutabazi Maurice asanga Imbuto Foundation yatangijwe na Madamu Jeannette Kagame akaba ari nawe Muyobozi wayo w'Ikirenga, ari yo yabasha kureberera neza irushanwa rya Nyampinga w'Igihugu. Ati "Imbuto Foundation izafate Miss Rwanda abe ariyo iyitegura, bayishakire Umuyobozi uzwi kandi uzwiho Ubwenge n'Indangagaciro nzima, akagira imbaraga za Politiki zidashidikanywaho. Abandi bose twayatamo, na MYCULTURE twayatamo. Bisaba inyigo y'ubwenge yubakanye ubuhanga, gusabwa ruswa ntuvuge bigahanishwa gukurwa mu irushanwa ndetse n'uwo yabibwiye wese. No room for privacy!".

Arakomeza ati "Ndizera ko First Lady azumva ubusabe bwacu. Mu mirimo myinshi afite akigomwa kuko Miss Rwanda ni uruhongore, tugomba kwigomwa ariko tukarurinda ibirura kuko biracyahari! THIS PIC IS A MESSAGE of hope ko next Year contestants [Iyi foto ni ubutumwa bw'ibyiringiro ko umwaka utaha abakobwa bazitabira Miss Rwanda] bazaba bari mu maboko mazima y'umubyeyi utazagira n'umwe acuruza ahubwo uzabubakamo icyizere no kuba abayobozi b'ejo bazubaka icyizere n'indangagaciro mu mwana w'umwali n'umutegarugori mu rwa Gasabo!".

Yanzura avuga ko Imbuto Foundation ariyo mahitamo yonyine ahari. Ni ko we abibona. Aragira ati "Imbuto Foundation ni yo mahitamo yonyine dufite kandi ibyabaye byadusigiye isomo rimwe rikomeye, we will never again play games with our young ladies, not even one single second [Ntituzongera n'isegonda rimwe gukoresha abakobwa bacu bato mu nyungu zacu/mu mikino yacu]".

Apostle Mutabazi asanga ko irushanwa rya Miss Rwanda rikwiriye gutegurwa na Imbuto Foundation

Mu kiganiro cyihariye na INYARWANDA, Apotre Mutabazi yatangaje ibintu 5 ashingiraho avuga ko Imbuto Foundation ariyo yonyine asanga yabasha kureberera neza irushanwa rya Nyampinga w'u Rwanda. Ubwo yasobanuraga ibyo yashingiyeho, yatangiye agira ati "Ikintu cya mbere ni uko nkunda gukora cyane, ndi 'Consultant' ariko nkunda gukora ku bintu bijyanye na 'Strategy' [Soma sitarateji], ndi 'Strategy Analyst' [Umusesenguzi w'ingamba], rero mu buyobozi kugira ngo ikintu kiyoborwe neza, ikintu cya mbere ushobora kubikoresha Umuyobozi Mwiza cyangwa se Umuyobozi Utyaye;

Cyangwa se Umuyobozi w'Imbaraga, cyangwa se ugaca mu yindi nzira yo gukoresha inzira y'imbaraga nyinshi. Reka mvuge ngo hari impamvu muri Afrika, tunafashe muri rusange, hakunda gukoreshwa Umuyobozi w'Imbaraga kuko sisiteme iba itizewe cyane. Si uko sisiteme nayo iba idahari, ariko ubishyize ku ijanisha ubona ko hashingiwe ku muyobozi kurenza uko hashingiwe kuri sisiteme n'imbaraga sisiteme ifite. Ariko ubundi bibaye byiza ugira umuyobozi mwiza na sisiteme nziza icyarimwe". Avuga ko "Iyo ibyo bintu bibiri bibonetse uba wizeye ko ikiyobowe cyangwa icyo uri gukora wizeye umusaruro kandi n'intsinzi irambye kandi yagutse".

Yavuze ko abantu bakwiriye kubanza kureba amateka ya Miss Rwanda, uburyo yiyubatse, abayiteguraga, urwego yari imaze kugeraho n'ibindi. Bityo bakibaza bati 'abayiteguraga ni 'Bantu ki' cyangwa se 'bubatse amateka ki?'. Yavuze ko byari bigeze ku rwego rugayitse rwo kuba bamwe mu bitabira iri rushanwa bemera gutanga amafaranga ndetse bakemera gukorerwa ihohoterwa rishingiye ku gitsina kugira ngo bakunde bitabire iri rushanwa". Agendeye kuri ibyo, Apostle Mutabazi yatangaje ibintu bitanu ashingiraho avuga ko Imbuto Foundation ariyo yaba amahitamo meza. Ibyo bintu bitanu ni ibi bikurikira:

1. Ni ababyeyi si abacuruzi

Apotre Mutabazi ati "Bityo rero nkaba navuga ibintu bitanu nk'uko wabimbwiye. Icya mbere dukeneye ko iyi Miss Rwanda ijya munsi y'Umuyobozi twizeye cyangwa se abantu babonamo ubwo bushobozi. Impamvu rero [navuze] Imbuto Foundation, ni uko ari Ikigo cyubashywe mu gihugu cyangwa Umuryango wubashwe mu gihugu. Icya kabiri ikaba idakorera inyungu, idaharanira inyungu. Biriya byari biri mu kigo cy'ubucuruzi (aravuga Rwanda Inspiration Back Up), kandi burya iteka umucuruzi atekereza gicuruzi. Rero hariya bizaba bigiye mu maboko y'umuntu udakorera inyungu ahubwo ufite ibindi bintu yiyubatsemo ndetse n'abaza gukora mu Muryango akaba ari wo mujyo bafata;

Kuko burya iteka abantu bakora inshingano za kiyobozi ariko munsi y'Umuyobozi Mukuru, bimera nk'aho iyo sisiteme ifata imico cyangwa se umujyo w'Umuyobozi Mukuru wayo. Niyo mpamvu ikigo gishobora kuba kitwara gutya wagihindurira umuyobozi kikitwara ukundi kuntu. Niyo mpamvu igihugu, n'iyo twabara u Rwanda, kiba cyaritwaraga uku munsi y'ubuyobozi bwa kanaka, haza ubundi buyobozi ukabona bifashe indi njyana. Aho ngaho rero nkavuga nti 'dukeneye gushyira imbaraga cyane ku muyobozi ariko nanone tutibagiwe itsinda ayoboye na sisiteme'".

Yunzemo ati "Mu gihugu hose rero nararanganyije amaso nditegereza ndavuga nti 'Ni ikihe kigo kindi gikomeye kitazigera kibonekamo amanyanga kuri Miss Rwanda?, Nsanga, icya mbere kuko ari abana b'abakobwa, nta handi ni mu Imbuto Foundation. Kuko ni bo bafite 'Women Empowerment' (kongerera ubushobozi abagore) mu nshingano zabo, kandi ibyo bakabikora batagamije inyungu ahubwo bakabikora ari wo mujyo bihaye. Ikindi, kuba atari abacuruzi icyo ni icya mbere. Kuva ku Muyobozi Mukuru kugera ku muntu ukoramo, ntibatekereza gicuruzi".

Apostle Mutabazi avuga ko yitegereje mu nzego zose asanga nta rwego na rumwe rwabasha gutegura neza Miss Rwanda uretse Imbuto Foundation

Indi mpamvu yasobanuye ko ari ukubera ko mu Imbuto Foundation "bafite ubuhamya bwiza bw'uko ibintu byaba bifite imitegurire itajegajega kandi itarimo amanyanga, bityo na Miss Rwanda nijya mu maboko yabo ntabwo tuzavuga ngo hari ukuntu ibintu bidateguwe neza, ngo bimeze nk'aho bitayobowe neza cyangwa se harimo agasigane, usange bimwe byadindiye se, usange nta ngengo y'imari ihari". Avuga ko byaca agasigane no kudakorera ibintu ku gihe.

Yavuze ko kuba Imbuto Foundation atari abacuruzi ahubwo bakaba ari "Ababyeyi", ari ingingo ikomeye yazana impinduka nziza muri Miss Rwanda baramutse bemeye kuyireberera. Yavuze ko kwizera uyu Muryango Udaharanira Inyungu ari ukubera ubunyangamugayo "bw'abawukoramo ariko by'umwuhariko Umuyobozi wabo". Yakomeje ati "Ntabwo rero azababera Umuyobozi gusa ushaka kubarebamo ubwiza, ahubwo azabaremamo umuyobozi u Rwanda rukeneye. Azabaremamo umwali yakifuje ko nyine umukobwa we aba we".

Ati "Azabubakamo ubuyobozi abubakemo n'u Rwanda no gukunda u Rwanda no gukorera u Rwanda, ari cyo cyaburaga muri Miss Rwanda kugera aho Perezida Paul Kagame avuga ngo ntacyo byari bimaze nta n'icyo byari bitwaye. Ariko icyo gihe [Madamu Jeannette Kagame] azatuma noneho Miss atongera kuvugwa atyo. Ahandi hose twabijyana yavugwa atyo, icya mbere ni uko bizaba bivuye mu maboko y'abacuruzi bigiye mu maboko y'ababyeyi, kandi umubyeyi uzabubakamo u Rwanda akabubakamo ubuyobozi, akabubakamo kwigirira icyizere. Iyo niyo ngingo ya mbere".

2. Imiyoborere myiza byo ku rwego rwo hejuru

Apotre Mutabazi Maurice asobanura ko "Ingingo ya kabiri ashingiraho atangaza ko Miss Rwanda ikwiriye gutegurwa na Imbuto Foundation ari ukubera ko ari ikigo "gifite imiyoborere myiza bijyanye nyine n'uko umuyobozi yacyubatse kandi akaba ari 'Umuyobozi Mwiza', bityo tubaka tuzaba twizeye ko nta makosa azabaho mu itegurwa, ndetse bizarusha ubwiza ibyakorwa n'abacuruzi".

3. Ni ikigo kitakwifuza ko hagira n'ijambo na rimwe ribi rivugwa ku gihugu cy'u Rwanda

Ingingo ya gatatu ashingiraho, avuga ko Imbuto Foundation ari "Ikigo kitakwifuza ko hagira n'ijambo na rimwe ribi rivugwa ku gihugu cy'u Rwanda". Yavuze ko igihe iri rushanwa ryategurwa n'Abacuruzi, icyo bazaba bitayeho gusa ni inyungu y'amafaranga bazasaruramo, ariko nirijya mu maboko y'abazaryitaho uko bikwiye nk'uko umwana yitabwaho n'Ababyeyi, "bazarinda irushanwa uko riteguye n'uko rikoze nk'abarinda imboni y'ijisho kubera ko bazaba bazi neza ko batifuza y'uko tujya kumva ngo murebe kuri Rfi no kuri Tv5 ngo bari kuvuga kuri Miss Rwanda n'uburyo kuba yaravuye mu maboko y'abacuruzi ikajya mu maboko y'ababyeyi ntacyo byahinduye".

4. Bizarema icyizere mu Bakobwa n'Ababyeyi babo

Apotre Mutabazi asanga Imbuto Foundation ifashe iri rushanwa, byatuma n'ababyeyi batajyaga bemerera abana babo kwitabira iri rushanwa, bazahita babemerera kuko bazaba bizeye imitegurire yaryo. Ati "Bizatuma abana bagira icyizere no kumva ko bari mu maboko meza bitume n'ababyeyi batajyaga bohereza abana babo babazana kuko bavuga bati 'nta wuzabahohotera bari mu Imbuto Foundation bacungirwa hafi n'ijisho rya Madamu Jeannette Kagame. Bazaba bafite icyizere, yaba abana ndetse n'ababyeyi, kandi iki cyizere nta n'ubwo kizaraza amasinde ahubwo kizatanga umusaruro cyangwa se kizatuma abantu baticuza impamvu bagize icyo cyizere".

5. Abana bazabasha gutinyuka

Aragira ati "Abana bazabasha gutinyuka bityo n'uwamurya urwara ahite atanga amakuru nta n'iminota itanu ishize bityo niba wenda uwo avuze ati yari ambwiye ibi, wenda mu kigo barimo hakaba harimo ama camera kandi ibyo ni ngombwa, babashe kuvuga ngo abikubwiriye hehe, bakurikirane basange koko bose bari bahagaze muri iyo nguni, babaze wa muntu bati kuki ushaka kuvuga ngo arakubeshyera kandi mwari muhagaze mu nguni imwe uri umu Judge, we akaba umu Contestant? Ni ibintu bitanu ariko ibindi byo bizakorwa ni ukubaka uburyo butajenjetse nko gushyiraho amategeko akomeye, ibyo wenda banabimbajije nanabibafasha kuko ni umusanzu buri munyarwanda wese akwiriye gutanga umusanzu.

Yatanze urugero ku mupasiteri mu kwerekana uburyo bwafasha muri Miss Rwanda aho umu Judge ntaho yahurira n'abakobwa bitabira irushanwa

Ati "Umupasiteri hari igihe abwiriza neza bamwaka amanimero bikazabyara ibibazo mu buyobozi bwacu bwa gipasitoro, ariko hari ukuntu bashyiraho Protocol y'uko uza mu rusengero ukinjira mu rusengero abakristo bicaye ujya ku ruhimbi ubwiriza, ukaza kuva ku ruhimbi bakiri mu rusengero nta n'urasohoka. Ujya muri Office bakujyana mu modoka muri hoteli cyangwa ahandi. Iyo ni Protocol ituma n'aho haba hari 'intension' wari ufite cyangwa se no kuvuga ngo byakugwiririye, bitabaho. Dushyizeho gahunda y'uko nta mukobwa witabiriye irushanwa wemerewe kuvugana n'umu Judge cyangwa se utegura irushanwa, cyangwa se kwegerana harimo intera ya Metero ziri munsi ya 10, cyangwa 100, tukavuga ngo turashyiraho Protocol zituma nta hantu umu Judge na Organiser bahurira n'umukobwa witabiriye irushanwa, ntaho!

Yanavuze ko na nyuma y'irushanwa rya Miss Rwanda, hashyirwaho uburyo bunyuranye "kugira ngo habeho gukumira icyaha", atanga urugero ko bashobora gushyiraho itegeko ribuza aba Judges guhura n'abakobwa. Yunzemo ati "Cyane rwose hashobora gushyirwamo imbaraga mu gihe irushanwa ririmo kuba, intera runaka igashyirwamo, irushanwa rikagenzurwa cyane, ririmo abantu batandukanye, mu bakobwa bitabiriye irushanwa harimo abakurikirana ibirimo kuba, mu bakanika amatara,....hagomba kubaho uburyo 'butajenjetse', ku buryo n'uzahirahira akagira icyo akora kitari muri Protocol yahawe zizaba zanditswe neza ziri ku murongo, uwo nguwo akabona ishyano cyangwa se agahita afatwa mpiri kandi byihuse. Ibyo ni byo bitinyisha abantu, ..."

Ati "Ikindi mu bazahitamo abantu, ahantu bazashyira imbaraga, nk'uko duhisemo First Lady na Organization ye ariko dushingiye cyane kuri First Lady nka we, ni na ko n'abantu bose bazakora muri icyo gikorwa hazabaho kuba screening bikomeye cyane ku buryo tumenya imico ye, muri karitsiye [tukamenya] imico ye, by'umwihariko bakagenda bareba abantu batagira 'tentative' yo kuba bagira ruswa bafata iyo ariyo yose. Ndumva ari ibyo navuga, kubera ko ibyo ni ibintu byigwa, bakavuga ngo aba bantu b'iyi myaka bashatse cyangwa badashatse, umuntu ufite ibibazo mu buzima ashobora kuba yarya ruswa kurenza aba n'aba. Kubaka sisitemi itajegajega, gufata abantu bazima, hari n'uburyo byasuzumwe ko ari bazima".

Kuki Apotre Mutabaza asanga Minisiteri y'Urubyiruko n'Umuco itabasha kureberera Miss Rwanda ?

Yabanje gusobanura impamvu yagarutseho no hejuru ishimangira ko Kompanyi y'ubucuruzi iyo ariyo yose ibatasha kureberera uko bikwiye irushanwa rya Miss Rwanda. Ati "Icya mbere abikorera cyangwa se abacuruzi bazahora ari abacuruzi, bazacuruza abakobwa nyine. Hariya ni ikosa ryakozwe ritagomba no kongera, nta n'umunyarwanda wabyizera bigiye mu maboko y'umucuruzi, icyo cyo ucyumve. N'iyo umucuruzi yaba ari gucuruza amavuta, akaba ari gucuruza amabati, iyo agiye kugurisha ntabwo atekereza nk'umubyeyi. Ni ukuvuga ngo we atekereza nk'umucuruzi mbere y'ibindi byose. Atekerereza mu nyungu mbere y'indi byose. Ntabwo uzabwira umucuruzi ngo nabubakemo umuco, we se arawufite, yaje gucuruza umuco?;

Nabubakemo ubunyarwanda, nabubakemo ubuyubozi, nabubakome kwigirira icyizere, uretse utuganiro tw'iminota bazajya babwira abayobozi ngo baze babahe, kugira ngo umuntu akwanduze ikintu cy'ubuyobozi cyangwa se cy'ingeso, bisaba kugira ngo mube mwabanye igihe,..kera ni ko bigishaga, wicaraga ku birenge by'umuntu mukagendana. Umuntu mwagendanye ukwezi, ibintu wamukuraho, bitandukanye n'iby'umuntu waje mu nama akavuga agafunga mikoro akagenda. Rero igituma abandi batabishobora, abacuruzi bazahora ari abacuruzi, kandi bazahora bareba mu nyungu, bakorera mu nyungu, bashaka gusagura menshi ashoboka".

Ku bijyanye n'impamvu Minisiteri ifite Umuco mu nshingano zayo, nayo asanga itabibasha, yagize ati "Ni ikihe kigo uzi mu Rwanda cyangwa Minisiteri iyo ariyo yose utazimo ikibazo cyo kuvuga ngo imishinga iradindira, rimwe na rimwe ingengo y'imari igasubizwayo, yizwe nabi se, hari ikigo waba uziho reputation yo kuba cyagira organisation iri impeccable? (imiyoborere yizewe itabamo amanyanga), kuko buriya nubwo izo Miss Rwanda zaba zirimo amakosa yandi, ariko abacuruzi bashobora kuba 'Bien organise' kugira ngo ibintu nyine bigire iyo shusho, umuterankunga ashyiremo amafaranga, bise neza, bivugwe cyane"

"Kwa kundi bavuga ngo barashaka ishusho ricyeye risa neza, ritwika, ariko biragoye ngo ubone Minisiteri ifite igikorwa runaka igashyira imbaraga mu itangazamakuru ngo batwike. Nta Minisiteri itwika, nta Kigo cya Leta gitwika. Ntabwo bakora imenyekanishabikorwa rihambaye". Yavuze ko ushobora gushyira uyu mushinga muri Minisiteri ugasanga isangwanywe indi mishinga isinziriye ni ukuvuga itarashyiwa mu bikorwa. Yibaza noneho ukuntu wayongereraho na Miss Rwanda igeze ku rwego rwo gutumbagira, ati "Byanga bikunda, ubikoze waba uri gukora ibintu muri bwa butyo bwa nikize, ukabikora nk'umunyapolitike n'umunya Diplomate ushaka kwikuraho ibintu no gushaka amaraporo uzandika ariko atazatanga ibisubuzo brambye".

Apotre Mutabazi ati "Navuga ngo rero na Imbuto Foundation ishobora kubireba ikavuga ngo Organisation yacu ukuntu isanzwe ikora ikeneyemo amaraso mashya azajya akorana na Miss Rwanda gusa, ariko tukabarokurita neza. Ikindi bagakorera munsi y'ubuyobozi bwa Imbuto Foundation bubakurikirana neza umunsi ku munsi, raporo zitangwa,..Ibi bintu byizwe neza, ibitekerezo byanjye hakongerwamo ibindi kuko sinjye njyenyine ugira ibitekerezo mu banyarwanda, byatanga ibisubizo birambye".

Apotre Mutabazi asanga Miss Muheto akwiriye kugororerwa

Nshuti Muheto Divine Miss Rwanda 2022 arasabirwa na Apotre Mutabazi gushimirwa byihariye nk'umukobwa wanze guhohoterwa muri Miss Rwanda. Hari amajwi aherutse kujya hanze bikekwa ko ari aya Muheto na Prince Kid aho uyu mukobwa yari arimo gusabwa 'ibyishimo' na Prince Kid ngo nk'igihembo cy'uko nawe yamurwaniye ishyaka muri Miss Rwanda. Prince Kid yavuze ko Muheto aramutse amuhaye 'ibyishimo' yazamufasha kugera kure mu mishinga ye, anatanga ingero z'abo yafashije bakagera ku gasongero. Iyo ukomeje kumva iryo jwi, hari aho ugera ukumva Prince Kid ari kuvuga ko ikintu atazibagirwa ari uburyo Muheto yamwimye 'ibyishimo'.

Apotre Mutabazi yabwiye InyaRwanda.com ko yabonye ubutwari muri Miss Muheto bityo akaba asanga uyu mukobwa akwiriye guhabwa inshingano mu mitegurire y'irushanwa rya Miss Rwanda cyangwa agashyirwa mu Akanama Nkemurampaka. Avuga ko Miss Muheto akwiriye kandi gushakirwa inzu nziza ya Etaje akoreramo, bakamuha imodoka nziza itari imwe itangwa muri Miss Rwanda, maze bikereka abandi bakobwa ko mu Rwanda kugira ngo witeze imbere bisaba gukora ibifitiye inyungu abanyarwanda benshi. Anasaba ko bishobotse na Se wa Muheto bamuha irindi peti [asanzwe ari Umupolisi ukomeye] nk'umubyeyi wareze neza. Yagize ati:

Kugira ngo abandi bakobwa babone ubutwari bwa Muheto babwigireho, kuriya kuntu yasezeranywaga ngo iterambere rye 'Personal Development' rizatumbagira aramutse yemeye iki n'iki [Ibyishimo], ahubwo bakaba bamuha nk'inzu nziza rwose ya etaje, imodoka nziza itari iriya muri Miss batanga, ni ukuvuga agahembwa cyangwa se agahabwa ibindi bintu bituma abandi bakobwa bavuga ngo 'Wawoo, mu Rwanda ahubwo ushaka iterambere mu byo ukora, wakora ibyiza mu nyungu z'abanyarwanda benshi'. Sinzi wenda nimba na Papa wa Muheto bamuha indi ranka nk'umuntu wareze neza cyangwa se kumushimira mu buryo bumwe cyangwa ubundi nk'umuntu wareze umukobwa neza. Mama we nawe bakaba bagira uko bamushimira kuko burya kugira ngo tugire umwali ufite iriya ndero n'uriya mutima ni uko hari ababyeyi baba babigizemo uruhare.

Yavuze ko Miss Mutesi Jolly na Miss Muheto Divine bataba amahitamo meza yo kuyobora irushanwa rya Nyampinga w'u Rwanda kuko "nta mbaraga za Politike bafite". Yashimangiye ko umuntu wahabwa kuyobora iri rushanwa ari ufite imbaraga za Politike. Arakomeza ati "Profile y'umuntu wayobora Miss Rwanda niyo yagena ko hadakorwamo amabi. Uyu muntu nawe azabikora kubera ko afite muri we kuvuga ngo bitagenze neza nanjye izina ryanjye ngomba kuririnda. Icya kabiri uyu muntu akaba asanzwe azi icyo bisobanuye kurinda igihugu. "

"(...) Dukeneye umuntu ufite ku mutima kumenya ngo ibyo ukora urabanza ukareba niba bitanduza igihugu, bidasebya igihugu, wa muntu nyine mu kanya utari buze kwifuza ngo Miliyoni 100,..bitewe n'uwo ari we n'urwego ariho akaba atari uwo muntu". Ati "Naho nituyifata tukayishyira muri MYCULTURE (Minisiteri y'Urubyiruko n'Umuco) uhembwa ibihumbi 500 Frw cyangwa ibihumbi 700 Frw agashingwa ibintu runaka muri yo, ntituzamenya igihe n'ubundi bya bindi bibi byayikorewemo. Ni ukuvuga ngo babifata bakabishyira muri Myculture, muri za Minisiteri, biziberayo".

Apotre Mutabazi asanga Miss Rwanda iramutse iteguwe na Imbuto Foundation nta mubyeyi wabuza umwana we kwitabira iri rushanwa

Apotre Mutabazi azwi cyane ku gitabo aherutse gusohora cyitwa 'African Poverty is a Choice'

Apotre Mutabazi avuga ko Miss Jolly atabasha gutegura neza Miss Rwanda kuko 'nta mbaraga za Politike afite'

Apotre Mutabazi yashimye ubutwari bwa Miss Muheto wanze gukorerwa ihohoterwa rishingiye ku gitsina

Madamu Jeannette Kagame ubwo yakiraga ba Nyampinga

Apotre Mutabazi arasaba ko Miss Rwanda yategurwa na Imbuto Foundation

Igitabo Apotre Mutabazi aheruka gusohora