Ahabanza Utuntu nutundi

Nyuma yo gushimuta uruhinja rw’umunsi umwe mu bitaro bigize ababyeyi batawe muri yombi

Yanditswe na: Tuyihimitima Irene'
Taliki:29/01/2025 21:53 0

Umugabo wo muri Nigeria n’umugore we w’Umutaliyani batawe muri yombi bazira gushimuta uruhinja nyuma yo kwigira ababyeyi.

Polisi yo mu Butaliyani yataye muri yombi Moses Omogo Chidiebere, Umunyanijeriya w’imyaka 43, hamwe n’umugore we Rosa Vespa, Umutaliyani w’imyaka 51, nyuma yo kubafatira mu cyaha cyo gushimuta uruhinja mu bitaro biherereye mu mujyi wa Cosenza, mu ntara ya Calabria.

Umugore n'umugabo barashinjwa gushimuta umwana

Ibi byabaye ku wa 22 Mutarama 2025, nyuma y’igihe cy’amasaha atatu polisi iri mu iperereza ryo gushakisha umwana. Vespa, wari waravuze ko atwite inda y’amezi icyenda, yemeje ku wa 8 Mutarama ko yibarutse umuhungu yise Ansel. Uyu mugore yinjiye mu bitaro yambaye nk’umuforomokazi maze afata uruhinja arujyana avuga ko arujyanye kwa muganga ngo rusuzumwe nk'uko tubikesha News Mirror.

Ku wa 25 Mutarama, urukiko rwo muri “Cosenza” rwategetse irekurwa rya “Chidiebere”, kuko ngo atari azi umugambi w’umugore we. Umunyamategeko we“Gianluca Garritano” yavuze ko uyu mugabo yizeraga ko koko umugore we atwite, ndetse ngo hari amafoto amugaragaza asoma inda y’umugore we.

Uruhinja “Sofia”, rwashimuswe, rwabashije gusubizwa iwabo ku wa 24 Mutarama, aho rwasanze ababyeyi barwo n’umuvandimwe warwo w’imyaka 6.