UEFA Champions League: Imibare ya Manchester City yagezweho naho iya Real Madrid irapfuba

Ni imikino yakinwe kuri uyu Wa Gatatu tariki ya 29 Mutarama 2025 Saa yine z'ijoro ku bibuga bitandukanye. Imwe mu mikino yari itegerejwe n'abenshi harimo uwo Manchester City yari yakiriyemo Club Brugge kuri Etihad Stadium.

Iyo kipe itozwa na Pep Guardiola yasabwaga gutsinda uyu mukino kugira ngo ijye mu mibare yo kubona itike yo gukina 'Playoffs ' gusa Club Brugge yabanje kuyigora dore ko ku munota wa 45 yari yafunguye amazamu ku gitego cya Raphael Onyedika ahawe umupira na Ferran Jutgla.

Mu gice cya kabiri Manchester City yaje ikora impinduka mu kibuga havamo Ilkay Gundogan hajyamo Savinho ndetse ikina byo gupfa ishaka uko yakwishyura. Kuwa 53 Mateo Kovacic yishyuye ku mupira yarahawe na John Stones, kuwa 62 Joel Ordonez atsinda igitego cya kabiri naho kuwa 77 Savinho atsinda icya 3 nabwo ahawe umupira na John Stones.

Manchester City yatsinze ibitego 3-1 ihita igera ku mibere yayo yo gusoreza mu makipe 24 ya mbere aho iri kumwanya wa 22.

Undi mukino nawo wari uhanzwe amaso ni uwo Brest yari yakiriyemo Real Madrid kuri Stade du Roudourou aho iyi kipe yo muri Espagne yasabwaga gutsinda inasaba ko amakipe ayiri imbere yatsindwa kugira ngo isoreze mu myanya 8 ya mbere.

Iyi kipe itozwa na Carlo Ancelotti yatsinze ibitego 3-0 bya Rodrigo ku munota wa 27 n'uwa 78 ahawe umupira na Kylian Mbappé na Jude Bellingham ku munota wa 56 ahawe umupira na Lucas Vazquez.

Nubwo Real Madrid yatsinze uyu mukino ariko ntabwo imibare yayo yo gusoreza mu makipe 8 ya mbere yagezweho aho yasoreje kumwanya wa 11.

Amakipe yasoreje mu myanya 8 ya mbere yaahise abona itike ya 1/8 cya UEFA Champions League 2024/25 mu gihe ayasoreje kuva kumwanya wa 9 kugeza kuwa 24 azahura hagati yayo akavamo andi 8 yerekeza muri 1/8.

Amakipe 8 ya mbere ni Liverpool ,Barcelona ,Arsenal ,Inter , Atletico, Leverkusen, Lille na Aston Villa .

Uko indi mikino yagenze;

Aston Villa yatsinze Celtic 4-2 ,FC Barcelona inganya na Atalanta 2-2, Bayer Leverkusen itsinda Sparta Prague 2-0 ,FC Bayern Munich itsinda Slovan Bratislava 3-1 naho Borussia Dortmund itsinda Shakhtar Donetsk 3-1.

Dinamo Zagreb itsinda AC Milan 2-1 ,Girona itsindwa na Arsenal 2-1 ,Inter Milan itsinda AS Monaco 3-0, Juventus itsindwa na Benfica 2-0 naho Lille itsinda Feyenoord 6-1.

Ni mu gihe kandi PSV Eindhoven yatsinzwe na Liverpool 3-2 ,RB Salzburg yatsinzwe Atletico Madrid 4-1 , Sporting CP inganya na Bologna 1-1 , Sturm Graz itsinda RB Leipzig 1-0 ,VFB Stuttgart itsindwa na Paris Saint-Germain 4-1 naho Young Boys itsindwa Crvena Zvezda 1-0.

Manchester City izakina imikino ya Playoff nyuma yo gutsinda Club Brugge 

Imibare ya Real Madrid yo kurangiriza mu makipe 8 ya mbere yavuyemo inshishi

Imyanya amakipe yasorejeho