Umwiza Phiona ashobora gushyirwa mu bazajya bategura irushanwa rya Miss Univesty of Africa

Miss Umwiza Phiona niwe wabaye igisonga cya mbere cya nyampinga w'u Rwanda 2020. Mu ijoro ryo ku wa Gatandatu tariki ya18 Ukuboza 2021, uyu munyarwandakazi wari uhagarariye u Rwanda muri Miss Univesty of Africa 2021 yaberaga mu Mujyi wa Abuja  muri Nigeria, yegukanye ikamba rya kane akaba yari ari mu bakobwa batanu bahabwaga amahirwe yo kwegukana ikamba muri 55 bari bahatanye bahagarariye ibihugu bitandukanye.

Umwiza Phiona yahacanye umucyo 

Mu kiganiro na Inyarwanda.com, Miss Umwiza Phiona yatangaje ko iri kamba rya kane yegukanye nta gihindutse rishobora kumuhesha amahirwe yo kuba umwe mu bategura iri rushanwa ngarukamwaka.

Hari aho yagize ati" Batanga ibihembo guhera kuwegukanye ikamba kugeza ku gisonga cya kabiri, hanyuma icya gatatu n'icya kane bahabwa amahirwe yo kuba bamwe mu bategura iri rushanwa mu yindi myaka". Yakomeje avuga ko kwegukana iri kamba byamuciriye inzira mu buryo bwinshi kuruta kubona amafaranga. Dukurikije ibyo yari amaze kugarukaho bijyanye n'amahirwe uwegukanye iri kamba rya kane afite, twamubajije niba buri mwaka azajya yitabira iri rushwanwa nk'umwe mu baritegura. Yasubije agira ati" Ntabwo neza ndabona amakuru ahagije ariko niko bimeze".

Kwegukana ikamba rya kane bishobora kumushyira mu bazajya bategura iri rushanwa nkuko yabitangaje 

Iyi yaba ari intambwe nziza ateye kandi byanamufasha gushyira mu bikorwa umushinga we ujyanye no guhindura imyumvire ku kuntu abana b'abakobwa baterwa inda bakiri bato bafatwa ndetse no guharanira iterambere ryabo cyane cyane binyuze mu kubateza imbere mu mishinga iciriritse y'ubworozi bw'amatungo magufi.

Umukobwa wo muri Somalia Adar Yusuf, niwe wegukanye ikamba rya Miss University of Africa 2021, naho Umunyarwandakazi Umwiza Phiona yegukana ikamba rya kane.