FERWAFA yashyize iherezo ku kibazo cya Nishimwe Blaise na Rayon Sports

Ku mugoroba wo kuri uyu wa Kane tariki ya 13 Kanama 2021, aka kanama kanzuye ko gusaba gusesa amasezerano Nishimwe yari yakoze, nta gaciro bifite, amasezerano yasinye agifite agaciro, akaba ari umukozi wa Rayon Sports kugeza 2023. Aka kanama kandi katesheje agaciro ubusabe bw’ikipe ya Rayon Sports bwo guhabwa indishyi z’ikurikiranarubanza n’igihembo.

Tariki ya 4 Kanama 2021, Nishimwe Blaise yandikiye akanama nkemurampaka ka FERWAFA asaba ko kamufasha agasesa amasezerano na Rayon Sports kubera ko itubahirije ibyo bumvikanye mu masezerano y’imyaka 3 yayisinyiye muri Nzeri 2020.

Akanama gashinzwe gukemura amakimbirane ka FERWAFA kakaba karahuje impande zombi tariki ya 11 Kanama 2021.

Kuri uyu wa Kane tariki ya 12 Kanama, kasohoye umwanzuro utesha agaciro ubusabe bw’uyu mukinnyi wifuza kwerekeza muri APR FC.

Perezida wa Rayon Sports, Uwayezu Jean Fidèle aherutse gutangaza ko Blaise yabasabye kugenda ariko ikipe imwifuza itanga amafaranga make kuyo bashaka.

Muri Nzeri 2020 nibwo Rayon Sports yasinyishije Nishimwe Blaise imukuye muri Marines FC imusinyisha amasezerano y’imyaka 3 bumvikana miliyoni 4 aho yahise yishyurwa miliyoni n’igice hasigara 2 n’igice, andi bumvikana ko azayabona mu mezi atatu ari imbere, gusa ntibyakozwe kuko byarindiriye iyi mpeshyi ya 2021.

Nishimwe Blaise ni umukinnyui wa Rayon Sports kugeza mu mpeshyi ya 2023.

FERWAFA yanzuye ko Nishimwe Blaise ari umukinnyi wa Rayon Sports kugeza mu 2023