Isaac Drogba umuhungu wa Didier Drogba yasinyiye ikipe yo mu Butaliyani

Uyu rutahizamu ukiri muto witezweho kubaka ibigwi nk'ibyo Se yakoze muri ruhago, nibwo bwa mbere agiye gukina mu ikipe y'abakuze, nyuma y'imyaka myinshi ahiga ubunararibonye mu makipe y'abakiri bato.

Kimwe na Se, Isaac Dogba yakiniye Chelsea y'abato ubwo yari mu ntangiriro zo kubaka urugendo rwe rwa ruhago, na none akomereza mu ikipe ya Guingamp y'abato yo mu Bufaransa mu 2018, ari nayo yakiniraga kugeza magingo aya.

Drogba w'imyaka 42 y'amavuko yakiniye Guingamp hagati y'umwaka wa 2002-2003, atsinda ibitego 23 mu mikino 49.

Umuhungu we Isaac, mbere yuko ayisohokamo yari amaze gushyirwa mu ikipe ya kabiri y'abatarengeje imyaka 19.

Ikipe ya Folgore Caratese Isaac Drogba yerekejemo iri ku mwanya wa karindwi, ikaba irushwa amanota abiri n'ikipe ishobora gukina imikino ya kamarampaka (Play Off) hashakwa itike yo kwerekeza mu cyiciro cya gatatu.

Drogba yasezeye kuri ruhago mu 2018, nyuma yo kugira ibihe bidasanzwe mu mwuga wo gukina umupira w'amaguru yatangiriye muri Le Mans mbere yo kwerekeza muri Guingamp zose zo mu Bufaransa.

Uyu rutahizamu wanabaye kapiteni w'ikipe y'igihugu ya Cote d'Ivoire igihe kirekire, yakomereje muri Marseille aho yatsinze ibitego 32 mu mikino 55 mbere yo kwerekeza muri Chelsea.

Mu myaka isaga 11 Drogba yamaze i Stamford Bridge, yahubatse amateka akomeye cyane muri ruhago, nyuma yo kuyitsindira ibitego 164, akayifasha kwegukana ibikombe 4 bya Premier League, ibikombe 4 bya FA, 3 bya League Cup, ndetse na UEFA Champions League ya 2012.

Mu 2015 nibwo uyu mukinnyi yavuye muri Chelsea, yerekeza ku mugabane wa Amerika muri  Montreal Impact, akomereza muri Phoenix Rising, yakiniye kandi amakipe ya Shanghai Shenhua na Galatasaray mbere yo gushyira akadomo ku mwuga we wo gukina ruhago.

Caratese yo mu Butaliyani yahaye ikaze Isaac Drogba

Umuhungu wa Drogba yitezweho kuzakora amateka nk'aya Se muri ruhago