Umuhanzi Ndagijimana Serge ukoresha izina rya Sergio nk’izina ry'ubuhanzi yasohoye amashusho y’indirimbo y’umunyabigwi mu muziki Niyomugabo Philemon yasubiyemo yitwa ‘Nyibwira’ iri mu zakunzwe mu buryo bukomeye.
Yabwiye INYARWANDA ko yahisemo gusubiramo iyi ndirimbo kubera ko yakuze ayikunda kandi Niyomugabo Philemon akaba ari umuhanzi afata nk’ikitegererezo cye.
Yagize ati “Impamvu nahisemo iyi ndirimbo n’uko nayikunze kuva mu buto bwanjye yaba amagambo yayo ndetse n’injyana yayo nakuze numva mfite inzozi zo kuzayiririmba none uyu munsi nakabije inzozi nahoranye kuva m ubuto bwanjye. Ni ibyishimo bidasanzwe,”
Niyomugabo Philemon afite indirimbo nyinshi zifashishwa mu gihe cy’ubukwe. Azwi mu ndirimbo zirimo ‘Ubukwe bwiza’, ‘Munsabire’, ‘Nanjye ndakunda’, ‘Ngwino’, ‘Nzakuzirikana’ n’izindi.
Niyomugabo ni umuhanzi wanditse amateka mu Rwanda. Yitabye Imana hagati y’umwaka wa 1998-2000 azize impanuka, asiga umugore n’uruhinja yari amaze iminsi yibarutse.
Yari umunyamuziki w’umunyabugeni utangaje wanakoze
kuri Televiziyo y’u Rwanda. Nyinshi mu ndirimbo yasohoye zifite inkomoko.
Hari nka ‘Zirikana ibanga’ yahimbiye umukunzi we wigaga mu Bubiligi, ‘Nzagukurikiza’ yahimbiye nyina witabye Imana, ‘Ubukwe bwiza’ yahimbiye Mukuru we wari wakoze ubukwe, ‘Munsabire’ yahimbye ari mu Bubiligi yivugaho n’izindi.
Sergio wasubiyemo indirimbo ya Philemon ni we uhagarariye Umuryango w’abanyeshuri biga ubuganga mu Rwanda uzwi nka MEDSAR (Medical Students Association of Rwanda).
Yakunze kuririmba muri Korali zitandukanye zirimo izo muri Groupe Officiel de Butare ari naho yize amashuri yisumbuye akaza gukomereza muri Chorale Le Bon Berger yo muri Kaminuza i Huye aho yatanze umusanzu we ukomeye mu kubaka iyo korali.
Iyindirimbo ‘Nyibwira’ Sergio yasubiyemo yatunganyijwe mu buryo bw'amajwi muri studio y’umuziki KCM Studi. Iyi akaba ari Studio nshya ibarizwa mu Gatenga irimo gutunganya indirimbo nyinshi kandi nziza muri iyi minsi.
Mu buryo bw’amashusho iyi ndirimbo yayobowe na Benjamin Munezero Umuyobizi wa Haya Photography afashijwe na Aime Pride mukuyisoza.
Sergio yasohoye amashusho y'indirimbo "Nyibwira" ya Niyomugabo Philemon yasubiyemo
Umuhanzi Niyonzima Oreste [ubanza i bumoso] ari kumwe n'umuhanzi Sergio wasubiyemo indirimbo ya Philemon
KANDA HANO UREBE AMASHUSHO Y'INDIRIMBO "NYIBWIRA" SERGIO YASUBIYEMO
TANGA IGITECYEREZO