Airtel Rwanda
Kigali

Coronavirus - Kenya: Senateri wafatiwe mu kabari yaciwe amande y'amadolari 150

Yanditswe na: Clementine Uwiringiyimana
Taliki:21/07/2020 16:11
0

Urukiko rwo muri Kenya rwahanishije senateri Johnson Sakaja gucibwa amande angana n'amadolari 150 y'Amerika (ni arenga 143,000 mu mafaranga y'u Rwanda) cyangwa gufungwa amezi atatu kubera gufatirwa mu kabari nijoro yarenze ku mabwiriza y'umukwabu yo kwirinda coronavirus.



Yafashwe mu rukerera rwo ku wa gatandatu, asanzwe ari kunywera mu kabari, hashize amasaha umukwabu wa saa tatu z'ijoro watangiye. Bijyanye n'uwo mukwabu, nta muntu uba wemerewe kuba ahatari iwe guhera saa tatu z'ijoro kugeza saa kumi za mu gitondo.

Uyu senateri usanzwe uhagarariye akarere k'umurwa mukuru Nairobi, yari yamaze gusaba imbabazi Abanya-Kenya ndetse yegura ku mwanya wo mu kanama gakomeye ko mu nteko gashinzwe kugenzura uko iki gihugu kirwanya Covid-19. Yari yanavuze ko yiteguye kwirengera ibikorwa bye.

Senateri Sakaja yafungiwe by'akanya gato ku biro bya polisi byo mu mujyi wa Nairobi, mbere yuko afungurwa amaze gutanga amafaranga y'ingwate.

Videwo iri guhererekanywa ku mbuga nkoranyambaga yagaragaye ku cyumweru, yerekana Bwana Sakaja w'imyaka 35 ari muri kasho ya polisi aterana amagambo n'abapolisi nyuma yo gutabwa muri yombi.

AHAVUYE ISANAMU, AFP

Abanya-Kenya bamaze igihe binubira ko amategeko akaze yo kurwanya coronavirus ashyirwa mu bikorwa mu buryo butandukanye bitewe n'uwo uri we. 

Binubira ko abanyapolitiki bayarengaho ku mugaragaro bagakoresha n’inama zitabirwa n'imbaga kandi izo nama zaraciwe. Polisi ya Kenya nayo yanenzwe gukubita, gukomeretsa no kwica Abanya-Kenya mu gihe cy'iyubahirizwa ry'ayo mategeko.

Zimwe mu ngamba zikaze zibuza guterana mu nsengero no kubuza ingendo mu duce tw'ingenzi tw'izingiro rya coronavirus, kuri ubu zakuweho, nubwo coronavirus ikomeje kwiyongera mu gihugu. Kugeza ubu muri Kenya abanduye coronavirus bageze ku 13,771, muri bo 238 imaze kubica.

Src: BBC






TANGA IGITECYEREZO

Izina ryawe
Email yawe
Andika igitecyerezo

Inyarwanda Art studio
Inyarwanda BACKGROUND