Mukesh Ambani uhigitse Jack Ma mu butunzi muri Asia yose yinjiza asaga ibihumbi $31 buri munota! Menya byinshi kuri we

Mukesh Dhirubhai Ambani yavutse kuwa 19 Mata 1957 Aden (agace kayoborwaga n’Abongereza) muri Yemen avuka mu muryango w’abana bane, Ababyeyi be ni Dhirubhani Ambani na Kokilaben Ambani.

Afite ubwenegihugu bw’u Buhinde, yashakanye na Nita Ambani bakaba bafitanye abana batatu. Ni umugabo w’umushoramari akaba ari we mukire wa mbere mu Buhinde no ku mugabane wa Asia nk'uko bitangazwa n’ikinyamakuru Forbes, umwanya yakuyeho umuherwe w’umushinwa Jack Ma.

Mu mwaka wa 1957 ababyeyi be baje kwimukira mu Buhinde aho se umubyara yaje gutangirira ubucuruzi. Bakigera mu Buhinde umuryango we Wabaga mu nzu nto y’ibyumba bibiri mu gace ka Bhuleshwar mu mujyi wa Mumbai.

Mu myaka ya za mirongo itandatu (1960s) Dhirubhani Ambani se wa Mukesh Ambani afatanyije na mubyara we bashinze kampani bise Reliance Commercial Corporation. Gusa mu mwaka 1966 yaje gutandukana na mubyara we maze akomeza wenyine kuyobora iki kigo cyakoraga imyenda. Muri Gicurasi 1973 iyi kompanyi yaje guhindura izina yitwa Reliance Industries Limited aho yaje kwagura ibikorwa byayo.

Mu mwaka 1981 Mukesh Ambani yatangiye gufasha se muri ubu bucuruzi bw’umuryango. Ubu bucuruzi bwaje kwaguka igera ku rwego rushimishije aho ubu iyi kompanyi ariyo iri ku mwanya wa mbere mu Buhinde mu agaciro ku isoko. Ikora ubucuruzi bw’ibijyanye na peteroli, gas, itangazamakuru, amabanki n’ibindi.

Urugendo rwe rw’amashuri

Amashuri ye abanza yayize ku kigo cya Hill Grange High School mu mujyi wa Mumbai, ayisumbuye ayiga ku kigo cya St. Xavier’s College muri Mumbai, Kaminuza yayize muri University of Mumbai aho yakuye impamyabumenyi mu bijyanye na Chemical Engineering.

Nyuma yaje gukomereza amashuri ye mu Leta Zunze Ubumwe za Amerika muri kaminuza ya Stanford University muri Califorinia. Mu mwaka 1981 yaje guhagarika amasomo ye asubira mu Buhinde gufasha se muri kompanyi ya Reliance yari ikiri nto ariko iri kwaguka cyane. Guhagarika amasomo ye muri Amerika byatewe na se washakaga ko umuhungu we aza akiga ubuzima bwo hanze aho kwirirwa yicaye mu ishuri maze akanamufasha mu guteza imbere kampani ye yari iri kwaguka muri iyi myaka.

Urugendo muri business

Nyuma y’urupfu rwa se mu 2002, hagati ya Mukesh Ambani n’abavandimwe be haje kuba amakimbirane yo kugabana imitungo kubera ko se yasize atayibagabanyije. Nyina ubabyara yaje kugerageza guhagarika aya makimbirane yari yavutse hagati y’abana be, ni bwo haje gufatwa umwanzuro wo kubagabanya kompanyi mo ibice bibiri maze Mukesh Ambani ahabwa kuyobora Reliance Industries Limited. Nyuma nibwo byaje kwemezwa n’urukiko rukuru rwa Mumbai mu kuboza 2005.

Nyuma yo guhabwa kuyobora iyi kompanyi yaje kuyagura cyane aho ubu ari imwe muri kompanyi zifite agaciro kanini ku isoko ryo mu Buhinde, aho ubu ibarirwa agaciro kagera kuri Miliyari ijana na mirongo itandatu z’amadolari y'Amerika ($160 Billion). Ikoresha abakozi bagera ku 194,056. Uyu mugabo muri iyi kompanyi imigabane ye igera kuri 47.37% akaba ari we uyibereye umuyobozi.

Nk'uko bitangazwa n’ikinyamakuru Forbes uyu mugabo umutungo we ubarirwa asaga Miliyari mirongo itandatu n’umunani na miliyoni magana ane z’amadolari y'Amerika ($68.4 Bilion), ibi bikamugira umukire wa mbere mu Buhinde no ku mugabane wa Aziya. Umwanya wo kuba umukire wa mbere mu Buhinde awumazeho imyaka igera kuri cumu n’ibiri yikurikiranya.

Ubuzima bwite

Mukesh Ambani yashakanye na Nita Ambani mu mwaka wa 1985, ubu bafitanye abana batatu ari bo Anant, Akash na Isha. Aba bombi bahuriye mu birori byo kubyina aho Mukesh yari yajyanye na se. Uyu mugabo abana n’umuryango we mu mujyi wa Mumbai mu nzu ndende yitwa Antilla, iyi ikaba inzu yo kubamo ihenze (Most expensive private residance) kuri iy’isi aho ibarirwa agaciro kagera kuri Miliyari imwe ($1Billion) y’amadolari.

Mukesh Ambani n’umuryango we

 Antilla inzu Mukesh Ambani abamo n’umuryango we

Mu mwaka wa 2008 uyu mugabo yabaye umuntu ufite ikipe ya siporo ihenze ku isi ubwo yaguraga ikipe y’umukino wa Cricket ya Mumbai Indians kuri Miliyoni ijana na cumi n’imwe n’ibihumbi Magana cyenda by’amadolari ($111.9 M) y'Amerika. Mukesh ni umufana ukomeye ya filime z’iwabo mu Buhinde (Bollywood Movies) aho ngo akoresha uko ashoboye akazireba nibura gatatu mu cyumweru.

Ibintu bitangaje wamenya kuri Mukesh Ambani

Mu mwaka 2007 uyu mugabo yahaye umugore we indege yo mu bwoko bwa Airbus A319 ifite agaciro ka Miliyoni mirongo itandatu z'amadolari ($60 M) nk’impano ku munsi we w’amavuko ubwo yizihizaga isabukuru y’imyaka 44 y’amavuko.

Mukesh Ambani n’umugore we Nita Ambani

Iyo ufite ubutunzi nk'ubu uri n’umukire wa mbere mu gihugu no ku mugabane wose birumvikana ko ugomba gukaza umutekano wawe, ni muri urwo rwego uyu mugabo atunze imodoka yo mu bwoko bwa BMW 760i ifite agaciro ka Miliyoni imwe n’ibihumbi Magana ane by’amadorali ($1.4 M). Iyi modoka yakorewe mu Budage ikaba idatoborwa n’amasasu (Bullet proof) kandi ikaba itakangirika mu gihe habaye iturika ry’ibisasu.

Uyu mugabo ntarya ibikomoka ku matungo (Vegetarian). Mu mwaka 2013 kompanyi ya Reliance abereye umuyobozi yari ifite gahunda yo gutangiza gahunda yo gucuruza ibiryo bizwi nka 'Fast Food' ariko we n’abandi bafatanyije muri iyi kompanyi batarya ibikomoka ku matungo ntabwo bashyigikiye ko bashyiramo ibikomoka ku matungo.

Mukesh Ambani iyo afashe ikiruhuko yikundira kujya mu gihugu cya Africa y'Epfo, aho ajyana n’umuryango we muri Pariki ya Kruger National Park, iyi pariki akaba imwe muri Pariki nini ziri muri Afurika hakaba harimo inyamaswa z’ubwoko bwose nk’intare, inkura, imbogo n’izindi. Uyu mugabo ngo akunda inyamaswa cyane.

Iyi kompanyi ye ya Reliance Industries itanga imisoro igera kuri 5% ku misoro yose itangwa mu Buhinde. Nyuma y'uko iyi kompanyi igiye mu maboko ye yateye imbere mu buryo bushimishije, aho mu mwaka wa 2017 agaciro kayo kageze kuri Miliyari zisaga ijana z’amadolari, ibi bikaba byaratumye imisoro itangwa n'iyi kompanyi ifasha mu kuzamura ubukungu bw’u Buhinde.

Azim Premji umuyobozi wa kompanyi ikora ibijyanye n’ikoranabuhanga ya Wipro akaba ari nawe bakurikirana ku rutonde rw’abakire mu Buhinde, Mukesh akaba mu mutungo amukubye inshuro enye zose. Nk'uko bigaragazwa na Forbes uyu mugabo Azim umutungo we ubarirwa asaga Miliyari cumi n’esheshatu na Miliyoni umunani z’amadolari ($16.8 Billion) Naho Mukesh akaba abarirwa asaga Miliyari mirongo itandatu n’umunani na miliyoni magana ane z’amadolari ($68.4 Billion).

Mu cyegeranyo cyakozwe mu mwaka ushize wa 2019 cyagaragaje ko ubutunzi by’uyu mugabo bwiyongeraho amadolari ibihumbi mirongo itatu na kimwe na magana abiri n’abiri by’amadolari ($31,202) buri munota. Ibi byagendeweho hashingiwe kuri Miliyari zisaga cumi n’esheshatu n’ibihumbi magana ane by’amadolari ($16.4 Billion) ziyongeraga ku mutungo we mu myaka ishize. Mu mibare bagabanyije n’iminota 525,600 igize umwaka basanga yinjiza $31,202 buri munota.   

Src: Business insider & The secondangle

 Umwanditsi: Soter DUSABIMANA-InyaRwanda.com