Airtel Rwanda
Kigali

Amateka y’Umwami Leopold II ushinjwa kwica Abanyekongo bagera kuri Miliyoni 10

Yanditswe na: Niyibizi Honoré Déogratias
Taliki:6/07/2020 10:06
0

Leopold II yabaye Umwami w’u Bubiligi kuva mu 1865 kugeza mu 1909 akaba yaranategetse Kongo nk'umutungo we bwite kuva mu1885 kugeza mu 1908. Mu gihe cy’ubutegetsi bwe Abanyekongo bari hagati ya Miliyoni icumi na cumi n’eshanu barishwe hakaba ari naho hakomotse inyito, ‘ibyaha byibasiye inyoko muntu’(Crime against humanity).



Ubusanzwe amazina ye yuzuye ni Leopold Louis Phillippe Marie Victor akaba yaravutse tariki 9 Mata 1835, avukira i Brussels mu Bubiligi. Leopold yavutse ari umuhungu w’ubuheta wa Lepols I aza no kumuzungura ku ngoma yamazeho imyaka 44.

Ni we mwami w’u Bubiligi warambye ku ngoma kurusha abandi. Cyakora nta muzungura yasize ngo amusimbure. Abami bariho ubu bakomoka ku mwishywa we Albert I ari nawe wamusimbuye.

Nyina wa Leopold yari igikomangoma cy’umwami w’u Bufaransa Louis Philippe waje guhungira mu Bwongereza kubera impinduramatwara yabaye mu Bufaransa mu 1848. Umwamikazi Victoria w’Abongereza yari mubyara wa Leopold II kubera ko se wa Leopold na nyina wa Victoria bavukanaga. Nyina wa Leopold yaje kwitaba Imana azize igituntu ubwo Leopold yari afite imyaka 15 gusa.
Leopold yabaye muri Sena mbere y'uko yima Ingoma.

Leopold yigaruriye Kongo ayitegeka nk’umutungo we, ibintu byahawe umugisha n’inama y’i Berlin yo mu 1884-1885 yari igamije kwigabanya Afurika. Yasahuye umutungo utagira ingano muri Kongo ahanini wiganjemo umutungo karemano nk’amahembe y’inzovu akanakoresha abaturage imirimo y’agahato.

Imitungo yakuyemo ni yo yakoresheje yubaka imishinga ikomeye mu gihugu cye cy’amavuko. Ubutegetsi bwe muri Kongo bwaranzwe n’iyica rubozo, ubwicanyi n’ubugome ndengakamere. Bivugwa ko abakoraga mu mirimo y’agahato bacibwaga intoki iyo umusaruro wabaga utagezweho.

N’ubwo hari bamwe mu bashidikanya kuri iyi mibare ahanini bashingiye ku kuba nta barura ryakozwe, bivugwa ko abaturage babarirwa muri Miliyoni 10 bapfuye ku gihe cya Leopold II .

Mu 1908 raporo z’impfu zageze kuri Guverinoma y’u Bubiligi maze yambura Kongo Leopold nyuma y’igitutu cy’umuryango mpuzamahanga wamaganaga ubwicanyi bwakorwaga. Vuba aha abigaragambyaga bamagana ihohoterwa ry’Abirabura batembagaje ikibumbano (statue) cye bakinaga mu mugezi.

Leopold yashakanye na Marie Henriette afite imyaka 18 gusa.Henriette wari umunya Otirishe yari umuhanzikazi n’umuririmbyi akaba yarakundaga indogobe. Babyaranye abana bane ariko umwe aza kwitaba Imana azize umusonga, ibintu byatumye Leopold agira agahinda bikaza no kumuviramo gutandukana n’umugore we. Leopold yagize inshoreke nyinshi akaba yaranabanye n’indaya y’Umufaransa Caroline Lacroix. Bakoze ubukwe mu ibanga iminsi itanu mbere y’uko apfa.

Mu 1902 Leopold II yapangiwe umugambi wo kwicwa n’Umutaliyani Gennaro Rubino, icyo gihe Leopold yariho atemberezwa mu birori byo kwibuka umugore we wari wapfuye muri katedarali ya Mutagatifu Gudule. Rubino yarashe amasasu atatu ariko ntiyamuhamya. Rubino yatawe muri yombi akatirwa igifungo cya burundu.

Leopold II yapfuye mu 1909 agwa ahitwa Laeken asimburwa na Albert. Benshi mu Babiligi bamwibuka nk’umwami w’umwubatsi kubera ahanini ibikorwa remezo bihambaye yubatse mu gihe cy’ingoma ye, ahanini akoresheje imitsi y’Abanyekongo.

Src: britannica.com&bbc.com






TANGA IGITECYEREZO

Izina ryawe
Email yawe
Andika igitecyerezo

Inyarwanda Art Studio

Inyarwanda Art studio
Inyarwanda BACKGROUND