Inyarwanda art Studio
Kigali

Ebola: Abaganga 3 bakekwaho ubwicanyi batawe muri yombi

Yanditswe na: Kaliza Liliane
Taliki:9/08/2019 11:08
0

Muri Repubulika Iharanira Demokarasi ya Congo abaganga batatu barafunze mu gihe hakomeje iperereza ryo kumenya uwishe umuganga w'ishami rya ONU ryita ku buzima, OMS, mu kwezi kwa kane.



Dr Richard Mouzoko yaguye mu gitero cyagabwe ku kigo gisuzuma abarwayi ba Ebola i Butembo. Itabwa muri yombi ry'abo baganga batatu ryakuruye icyuka kibi mu bakozi b'ubuzima i Butembo.

Bakangishije ko bashobora guhagarika akazi niba bagenzi babo batemerewe gukurikiranwa badafunze. Ibitero byibasira abashinzwe guhangana na Ebola ndetse naho ivurirwa ni imwe mu mbogamizi zo kurwanya icyo cyorezo gihitana abantu mu burasirazuba wa Congo.

Iyicwa ry'umuganga w'inzobere mu kuvura indwara z'ibyozerezo, wari umukozi w'ishami ry'umuryango w'abibumbye ryita ku buzima waguye i Butembo mu kwezi kwa kane ryabaye ikimenyetso cy'uko bintu bimaze gukomera.

Umushinjacyaha w'urukiko wa gisirikare, Kumbu Ngoma, yabwiye BBC ko abagabo bahaswe ibibazo ku bijyanye nicyo gitero cyamenye amaraso batanze amazina y'abaganga 4 bo muri ako gace bakekwaho kuba barafashije gutegura icyo gitero.

Batatu muri bo bamaze gutabwa muri yombi, ariko ntibarahamywa icyaha. Umushinjacyaha avuga ko iburanisha rizabera mu ruhame rwa benshi. Cyakora, ihuriro ry'abaganga i Butembo rivuga ko inzira y'ubutabera izatwara igihe rikaba risaba ko bagenzi babo bafungurwa by'agateganyo hatanzwe ingwate.

Umuyobozi w'ishyirahamwe ry'abaganga yabwiye BBC ko bariho bagirana ibiganiro na leta, ko ariko igitekerezo cyo kwigaragambya nacyo batarakirekura.

Mu gihe abaganga bakwigaragambya, ihururo ry'abaforomo n'abaforomokazi ryo muri ako gace naryo ryatangaje ko rizifatanya nabo, ngo kuko ingaruka zaba ari nyinshi ku buzima bw'abantu.

Urwego rushinzwe ubuzima mu karere ka Butembo rurakomeza gutanga amakuru y'abarwayi bashya ba Ebola imaze kwica abarenga 1800 mu burasirazuba bwa Repubulika Iharanira Demokarasi ya Congo kuva icyo cyorezo cyabonekayo hashize umwaka.

Src: BBC








Inyarwanda BACKGROUND