Airtel Rwanda
Kigali

Amitabh Bachchan wamamaye muri filime z’abahinde n’umwana we banduye Covid-19

Yanditswe na: Janvier Iyamuremye
Taliki:12/07/2020 10:16
0

Amitabh Bachchan, icyamamare muri filime z’abahinde n’umwana we Abhischek basanganwe Covid-19 nk’uko byatangajwe kuri uyu wa Gatandatu.



Amitabh n’umwana we Abhischek bajyanwe mu bitaro bimwe bya Nanavati Hospita biherereye mu Mujyi wa Mumbai. 

Amitah ukurikirwa n’abarenga miliyoni 43 kuri Twitter, yatangaje ko yanduye Coronavirus kandi ko abo mu muryango we n’abo bakinana bose bafashwe ibizamini hategerejwe ibisubizo.

Ati “Nasanganywe Covid-19 mpita njyanwa mu bitaro. Abo mu muryango wanjye n’abo dukinana bose bafatiwe ibipimo, hategerejwe ibisubizo.”

Umuhungu we Abhishek Bachchan w’imyaka 44 y’amavuko yavuze ko bamenyesheje inzego z’ubuzima kandi ko n’abo bahuye batangiye gusuzumwa kugira ngo bamenye uko ubuzima bwabo buhagaze.

Inshuti, abafana, abanyapolitiki, abacuruzi n’abandi bifurije uyu muryango gukira iki cyorezo gikomeje kwica ibihumbi by’abantu ku Isi.

Uwitwa Manoj Pandit yavuze ko agiye gukomeza gusenga kandi areke ibyo kurya kugeza Amitabh n’umuhungu we bavuye mu bitaro.

Imibare igaragaza ko abantu barenga ibihumbi 820 bamaze kwandura Coronavirus mu Buhinde, aho yishe ibihumbi 22.

Mu masaha 24 ashize, Leta y’u Buhinde yatangaje ko abantu 27,114 banduye Coronavirus bituma iki gihugu kiza ku mwanya wa Gatatu ku Isi mu byazahajwe n’iki cyorezo nyuma ya Leta Zunze Ubumwe za Amerika na Brazil.

Umujyi wa Mumbai ufite abantu barenga ibihumbi 84 banduye Coronavirus mu gihe abantu 4,899 imaze kubica.

Amitabh Bachchan w'imyaka 77 yari amaze iminsi yifashishwa mu Buhinde mu bikorwa bigamije gukangurira abantu gukomeza kwirinda Covid-19.

Yinjiye mu ruganda rwa cinema mu 1969, aho yakinnye muri filime zirenga 200. Mu 1982 yagiriye imvune mu ifatwa ry’amashusho ya filime bituma amara igihe adakina.

Bachchan azwi muri filime zakomeje izina rye nka “Zanjeer”, “Sholay” n’izindi. Filime yakinnyemo zamuhesheje ibihembo mpuzamahanga bikomeye nka ‘The Legion of Honour’, ‘National Film Awards’ n’ibindi.

Mu 1984, Bachchan yinjiye muri politiki atorewe kuba umwe mu bari bagize Inteko Nshinga Amategeko.

Nyuma y’imyaka itatu yareguye ku mpamvu yavugaga ari ruswa yari mu butegetsi bwa Minisitiri w’Intebe Rajiv Gandhi.

Amitabh n'umuhungu we banduye Coronavirus, abo mu muryango we n'abo bakinana nabo batangiye gupimwa

Bachchan wanduye Covid-19 yari amaze yifashishwa na Leta akangurira abaturage kwirinda iki cyorezo





TANGA IGITECYEREZO

Izina ryawe
Email yawe
Andika igitecyerezo

Inyarwanda Art studio
Inyarwanda BACKGROUND