Ahabanza Imyidagaduro

UDUSHYA: Buravan yambikanye impeta, imfura ya Ciney yatangiye kwitabira ibitaramo-AMAFOTO+VIDEO

Yanditswe na: Janvier Iyamuremye
Taliki:2/12/2018 4:56 1

Umunyamuziki Dushime Burabyo Yvan (Yvan Buravan) yakoze igitaramo cy’amateka gisize yambikanye impeta n’umukobwa wamufashije gukina inkuru y’urukundo yakorewe muri Laboratwari y’urukundo “The Love Lab”. Ni igitaramo kandi cyahagurukije n’imfura Ciney yabyaranye n’umugabo we Ronald Tumusiime.

Igitaramo cya Buravan cyabaye mu ijoro ry’uyu wa Gatandatu tariki 01 Ukuboza, 2018 kibera mu ihema cya Camp Kigali. Ni igitaramo cyitondewe mu mitegurire kuva ku munota wa mbere kugeza gisojwe. Cyaranzwe n’ubwitabire bw’abanya-Kigali n’abandi ibihumbi n’ibihumbi bari baje gushyigikira uyu musore wamurikaga alubumu ya mbere kuva yakwinjira mu kibuga cy’abanyamuziki.

Iki gitaramo cyatangiye saa mbili z’ijoro cyaranzwe n’udushya dutandukanye twasize urwibutso mu bacyitabiriye, twaguhitemo ibintu bitanu byatangaje benshi:

1.Divine yifashishijwe na Buravan mu gushushanya inkuru y’urukundo

Divine Isimbi ni umunyamakuru wa Radio/Tv10 niwe wifashishijwe na Yvan Buravan mu gukina inkuru y’urukundo ikorewe muri Laboratwari y’urukundo “The Love Lab”. Uyu mukobwa ngo mbere y’igitaramo yabwiraga abo bakorana ku kazi ko azabatungura mu gitaramo akabereka ko ari inzobere mu kubyina no gushushanya inkuru y’urukundo ihuriweho n’abantu babiri.

Divine yageze ku rubyiniro yambaye imyenda yabugenewe y’abakora muri Laboratwari. Yegereye ameza yariho ibikoresho bitandukanye byifashishwa muri Laboratwari atangira kuvangavanga ibintu bitandukanye. Mu minota mike haserutse umusore ubona ko yacitse intege, yambaye isarubeti y’umweru apfutse mu maso, afite ibyo ahumekeramo asanganira Divine muri Laboratwari.

Yvan Buravan yifashishije umunyamakuru Divine wa Radio/TV10 mu gukina inkuru y'urukundo y'ibyo yaririmbaga.

Uyu musore yafatanyije na Divine kugira ibyo bavanga, ibivuyemo aterera ku munwa, ahita acika intege aramirwa na Divine amwicaza ku ntebe. Acyicara ku ntebe yahise akuramo inkweto yambara izindi, akuyemo ingofero(adahuza amaso n’abari muri iki gitaramo) abantu bavumbura ko ari Buravan bamukomera amashyi abandi bavuza akururu. Uyu musore yahise akuramo n’isarubeti yari yambaye asigarana undi mwenda yari yambariyeho yegera imbere ku rubyiniro ashimisha abafana be mu ndirimbo zitandukanye.

2.Imfura ya Ciney n’umugabo we yatangiye kwitabira ibitaramo

Uwimana Aisha wamenyakanye nka Ciney mu muziki Nyarwanda akaba n’Umunyamakuru ukomeye yageze muri iki gitaramo aje gushyigikira umuvandimwe we Yvan Buravan yitwaje imfura ye imaze ukwezi ivutse.

Yinjiye anyuze ku ruhande rwariho afana benshi. Yari acunze akagare karimo umwana we. Ni akagare kari korosheho agatambaro k'umweru ku buryo bitoroheye buri wese kubona umwana we. Yinjiye kandi ari kumwe n’abandi bantu babiri, bakomeza urugendo bicara mu myanya y’imbere. Baje kugenda iki gitaramo kitararangira.

3.Yvan Buravan yambitse impeta umukobwa muri iki gitaramo

Mu ndirimbo nshya ziri kuri iyi alubumu yamuritse uyu munsi hari ho indirimbo y’urukundo. Ni indirimbo yaririmbye yambaye imyenda y’ibara ry’umweru atambirije ibimeze nk’ikamba mu mutwe. Yakomeje kuririmba amagambo y’urukundo avuga ko ati ‘uri uwanjye’. Haseruka umukobwa wambaye ikanzu y’abageni iherekejwe n’ivara.

Uyu mukobwa yari kumwe n’abo mu muryango bamugaragiye, ubona anezerewe asanganira umukunzi we Buravan. Mu minota micye haserutse Pasiteri aha umugisha urukundo rwabo. Yabasabye ko bambikana impeta nk’ikimenyetso cy’uko bemeranyije kubana nk’umugabo n’umugore, babikora mu buryo bwanyuze benshi. Bombi bamaranye iminota nk’itatu barebana akana ko mu jisho, abari muri iki gitaramo banyurwa n’uburyo babiteguye n'ubwo byari umukino.

4.Buravan yahinduranyije imyambaro ishuro zigera kuri eshatu

Uyu muhanzi yerekanye ko yashyize imbaraga nyinshi mu gutegura iki gitaramo yamurikiyemo alubumu “The Love Lab”. Yatangiye igitaramo cye yambaye imyenda ishushanya umuntu uri muri Laboratwari, mu minota micye yayikuyemo asigarana iyo yari yambariyeho.

Asoje igice cya mbere cyo kumurika alubumu “The Love Lab” yagarutse ku rubyiniro yambaye imyenda y’ibara ry’umweru n’inkweto z’umukara akomeza gushimisha abafana mu ndirimbo ze yakubiye kuri alubumu yakozweho n’abahanga mu muziki nka Producer Bob, Pastor P n’abandi bakoze akazi gakomeye.

Mu gice cya kabiri cyo kumurika alubumu ye “The Love Lab” yagarutse yambaye imyenda idoze mu gitenge. Yagaragaje ko ari umuhanzi ukwiye guhangwa amaso mu rugendo rw’umuziki, ashimangira ko kuririmba ari impano yatunga benshi ariko ikwiye gushyigikirwa mu nguni zose.

5. Yvan Buravan yavuze izina Shaddy Boo nawe yongera umurego wo kubyina

Shaddy Boo yagaragaje ko ari umunyabirori ukomeye bishimangirwa n’imyambaro ye ndetse n’uburyo agira itsinda ry’inkumi basangira manyinya. Yari agaragiwe n’abarimo umuhanzikazi Asinah ndetse na Sacha Katee. Yinjiye mu gitaramo arangarirwa na benshi bitewe n’imyambarire ye ndetse n’iya bagenzi be bari kumwe.

Igitaramo cyinikije yaje kwirekura arabyina, itangazamakuru riramurangarira n’abandi. Ni umugore ushize amanga imbere y’ibyuma bifata amashusho, yashyigikiye mu buryo bukomeye Yvan Buravan dore ko yahavuye igitaramo gisoje. Ubwo Buravan yaririmbaga indirimbo ye yise “Oya” yamuciye iryera abona Shaddy Boo yizihiwe, maze agira ati ‘Shaddy Boo’ abari muri iki gitaramo bavuza akaruru k’ibyishimo.

AMAFOTO:

1.Divine yifashishijwe na Buravan mu gushushanya inkuru y’urukundo