Nyina wa Stromae yongeye kugaragaza ko akunda kandi anyotewe no gukurirana muzika nyarwanda - Amafoto

Kuwa Gatanu tariki 1 Mata 2016, nibwo i Bruxelles mu gihugu cy’u Bubiligi habereye igitaramo cy’inkera y’abanyarwanda, aho abahanzi batanu b’intyoza mu njyana z’umuziki nyarwanda gakondo bafatanyije n’abacuranzi babo, bakoze igitaramo cy’umuziki w’umwimerere wakoreshejwemo ibicurangisho gakondo nk’inanga.

Iki gitaramo cyari kirimo imbyino, inanga gakondo n'ibindi bigaragaza umwimerere w'i Rwanda

Daniel Ngarukiye; umwe mu bakirigitananga bamaze kwigarurira imitima ya benshi mu banyarwanda

Abasore b'abanyarwanda bakoze mu mihogo banakirigita inanga benshi baranyurwa

Charles Uwizihiwe; umuhanzi w'umuhanga mu ndirimbo za gakondo uba mu Bubiligi nawe yarataramye

Iki gitaramo cyari cyateguwe n’abahanzi b’abanyarwanda b’abahanga mu guhogoza umuziki gakondo no gukirigita inanga, muri abo hakaba harimo Daniel Ngarukiye uzwi cyane muri Gakondo Group ariko akaba asigaye yibera i Burayi aho abana n’umugore we ukomoka muri Romania, akaba yari kumwe n’umusore ukomeje kunyura benshi mu njyana gakondo witwa Charles Uwizihiwe, hamwe n’abandi bamenyerewe muri izi njyana barimo Nyiratunga Fofo, Lionel Sentore na Bizigira Benimana.

Nyina wa Stromae ni umwe mu bari bitabiriye iki gitaramo cy'inkera nyarwanda

Mu bantu benshi bari bitabiriye iki gitaramo biganjemo abanyarwanda n’abarundi baba mu Bubiligi, hari harimo na Miranda Marie Van Haver; nyina w’icyamamare Stromae wagaragaje ko yashimishijwe cyane n’umuziki w’umwimerere w’abanyarwanda, ibi bikaba byarashimangiye ko akunda muzika nyarwanda kandi aba anyotewe n’ibitaramo by’abanyarwanda, kuko no mu kwezi gushize kwa Werurwe yari yitabiriye igitaramo The Ben yakoreye muri uyu mujyi wa Bruxelles.

Mu gitaramo The Ben aherutse gukorera mu Bubiligi, nyina wa Stromae yari mu mbaga y'ibihumbo by'abantu bakitabiriye

Muri iki gitaramo cya The Ben, nyina wa Stromae yanahabonaniye na Ambasaderi w'u Rwanda mu Bubiligi