Igikorwa cy’amajonjora mu irushanwa rya Miss Rwanda 2016, kuri uyu wa Gatandatu tariki 16 Mutarama 2016, cyakomereje mu karere ka Huye aho abakobwa bo mu Ntara y’Amajyepfo babyifuza bose bagombaga guhurira bagatoranywamo abazahagararira iyi Ntara muri aya marushanwa.
Kimwe mu byaranze aya marushanwa mu Ntara y’Amajyepfo, harimo ubwitabire bucye kuko abakobwa 7 gusa ari bo baje guhatana, ndetse nyuma yo gupimwa ibiro, uburebure no kureba ibindi byose bisabwa, bose bemererwa guhatana ngo batoranywemo abatsinda bazahagararire Amajyepfo mu marushanwa ya Miss Rwanda 2016. Abategura aya marushanwa batangarije abanyamakuru ko n’ubwo haje abakobwa barindwi, abari biyandikishije muri iyi ntara bose bari 12 ariko batanu bakaba batigeze bagera ahabera amajonjora.
Abakobwa baje mu majonjora bari bacye. Aha bari bamaze kuba batandatu
Abakobwa bose babanzaga kubapima kugirango barebe ko bujuje ibiro n'uburebure busabwa
Abakobwa 7 bitabiriye aya marushanwa yabareye i Huye, ni Nasra Bitariho, Ingabire Angelique, Karake Umuhoza Doreen, , Isimbi Edouige, Uwase Aline, Abi Gaelle Gisubizo ndetse na Umutoniwabo Cynthia, uyu we akaba atari n’ubwa mbere agerageje amahirwe kuko yanitabiriye amajonjora mu Ntara y’Amajyaruguru anuzuza ibisabwa ariko ntiyashimwa n’abagize akanama nkemurampaka.
Uhereye ibumoso aba ni Nasra Bitariho, Ingabire Angelique, Karake Umuhoza Doreen, , Isimbi Edouige, Uwase Aline, Abi Gaelle Gisubizo na Umutoniwabo Cynthia
Abagize akanama nkemurampaka bari biteguye gutanga amanota bagendeye ku myiyerekano n'imisubizire y'aba bakobwa
Abakobwa bose bagiye bagera imbere y'abagize akanama nkemurampaka bakabazwa ibibazo
Nyuma yo kugera imbere y’akanama nkemurampaka kagizwe na Mike Karangwa, Miss Rusaro Carine na Mugabushaka Jeanne de Chantal bakunda kwita Eminente, imyiyerekano bakoze n’uburyo basubije ibibazo babajijwe byatumye bamwe muri bo basezererwa, hatoranywa abakobwa 4 bazahagararira iyi Ntara y’Amajyepfo muri Miss Rwanda ari bo Isimbi Edouige, Nasra Bitariho, Umutoniwabo Cynthia na Karake Umuhoza Doreen.
Abakobwa 4 batsinze bafashe ifoto y'urwibutso na Eminente
Mike Karangwa yashimiye abakobwa bitwaye neza, ari nabo bahagarariye Amajyepfo muri aya marushanwa
Eng
RSS 
TANGA IGITECYEREZO