Amarangamutima yarenze Ally Soudy ubwo yari abajijwe uko yiyumva kuba agiye kuyobora igitaramo cya Cecile Kayirebwa muri Amerika

Ally Soudy yabwiye Inyarwanda.com ko ku bwe afata Cecile Kayirebwa nk'umuhanzikazi w'amateka mu Rwanda ndetse no ku mugabane wa Afurika. Uyu mugabo yakomeje avuga ko ku bwe ku bwe afata Cecile Kayirebwa nk'umuhanzikazi wa mbere mu Rwanda dore ko ku bwe anahamya ko nta mugabo umurusha kwamamara n'ubuhanga mu muziki.

Tuganira Ally Soudy yabwiye umunyamakuru ko buri gihe ahora arota kuba yakwitabira igitaramo kirimo Cecile Kayirebwa ariko ntibimworohere cyane ko muri iyi myaka ari kuba muri Amerika ariko ashimira Imana ko agiye noneho kwitabira iki gitaramo ari nawe ukiyoboye. Yagize ati"Ku kibazo cy'uko niyumva mbere yo kubora igitaramo cya Cecile Kayirebwa rero kubona ijambo nakoresha nsubiza iki kibazo byangora. cyereka nsubiye mu mateka nkakubwira uko mufata ku giti cyanjye...njye mufata umwamikazi w'umuziki w'u Rwanda."

Igitaramo cya Cecile Kayirebwa Ally Soudy agiye kuzayoborera muri Amerika

Ally Soudy yakomeje agira ati"Uyu munsi kumbwira ngo ngiye kuyobora umuntu nakuze ndota, nakuze ndota kuzabona. Ndibuka ko mbere ya Jenoside mama yari afite ama kasete ariho indirimbo za Cecile Kayirebwa twajyaga dukina indirimbo ze cyane nakuze mwumva kubera mama wamukundaga, rero kuba mama yarishwe muri Jenoside ariko yari umwe mu bamukundaga ni kimwe mu bintu bituma mukunda cyane."

Uyu mugabo watangaje ko aheruka Cecile Kayirebwa kera ubwo yakoraga kuri radiyo hano mu Rwanda yari yamutumiye mu kiganiro yatangaje ko yishimiye bikomeye kuzayobora iki gitaramo ndetse ariko anashishikariza abantu kuzitabira iki gitaramo giteganyijwe tariki 25 Kanama 2018 aho kwinjira ari amadorali ya Amerika 25, 30,35 na 40 igitaramo kizabera muri Indiana.