RFL
Kigali

Bundesliga yabaye Shampiyona ya mbere yemerewe gusubukura i Burayi, itariki yo gusubukuraho yamenyekanye

Yanditswe na: SAFARI Garcon
Taliki:8/05/2020 10:00
0

Shampiyona y’Icyiciro cya Mbere mu Budage “Bundesliga” n’icya Kabiri, zemerewe kongera gukinwa mu mpera z’uku kwezi kwa Gicurasi, nyuma y’igihe kigera hafi ku mezi abiri zihagaritswe kubera icyorezo cya Coronavirus cyahagaritse ibikorwa byinshi kinahitana ubuzima bwa benshi ku Isi.



Iyi shampiyona iciye agahigo ko kuba iya mbere igiye gusubukurwa kare mu zasubitswe, kuko hari n’izasheshwe zitarangiye,  kubera umuvuduko Coronavirus iriho mu bihugu bitandukanye hafatwa umwanzuro wo gutegura shampiyona y’umwaka utaha.

Amakipe yo mu byiciro bibiri bibanza yari yemerewe gusubukura imyitozo guhera tariki ya 7 Mata, agakora hubahirijwe amwe mu mabwiriza yo kwirinda Coronavirus.

Mu Cyumweru gishize, Ishyirahamwe ry’Umupira w’Amaguru muri icyo gihugu, DFL, ryatangiye gupima abakinnyi Coronavirus ndetse mu bipimo bisaga 1700 byafashwe, hagaragayeho ko hari abakinnyi 10 banduye, bashyirwa mu kato.

Kuri uyu wa Gatatu tariki ya 6 Gicurasi, Chancelière w’u Budage, Angela Merkel yatanze uburenganzira ko umupira w’amaguru ushobora kongera gukinwa muri icyo gihugu ndetse atari ngombwa ko abakinnyi babanza gushyirwa mu kato.

Yagize ati “Gufata ibipimo birasanzwe mu makipe, ku bw’ibyo akato k’iminsi 14 ntabwo ari ngombwa”. Uyu muyobozi  yavuze kandi ko imikino izasubukurwa mu mpera z’uku kwezi, ariko ikajya iba mu muhezo, nta bafana bari ku kibuga.

Ubuyobozi bwa Bundesliga buzaterana ku wa Kane i Frankfurt mu nama y’Inteko Rusange iziga ku mabwiriza y’ubuzima azakurikizwa kugira ngo imikino yongere kuba. Hazigwa kandi no kuri ngengabihe ya shampiyona n’igihe imikino izasubukurirwa.

Menshi mu makipe akina muri Bundesliga yari asigaje imikino icyenda- Eintracht Frankfurt na Werder Bremen zifite imikino 10.

Bundesliga yahagaritswe muri Werurwe hagati ubwo Bayern Munich yari ku mwanya wa mbere, irusha amanota ane Borussia Drortmund ya kabiri mu gihe haburaga imikino icyenda ngo iyo shampiyona ishyirweho akadomo.

Mu bihugu bitandukanye byiI Burayi, harimo u Bufaransa, u Buholandi ndetse n’u Bubiligi, bob amaze gusesa umwaka w’imikino wa 2019-2020, utarangiye kubera iki cyorezo.

Kugeza magingo aya, imibare igaragaza ko mu Budage habarirwa abarwayi ba Coronavirus basaga ibihumbi 150 mu gihe abamaze kwicwa n’iki cyorezo barenga 6300.


Bayern Munich ni yo ifite amahirwe menshi yo gutwara igikombe cya shampiyona cy'uyu mwaka mu Budage





TANGA IGITECYEREZO

Izina ryawe
Email yawe
Andika igitecyerezo


Inyarwanda BACKGROUND