USA: Trump yavuze ko mu minsi micye abaturage basubira mu buzima busanzwe kuko kuguma mu kato na byo ngo ni urupfu

“Turarebera hamwe uko abaturage basubizwa mu buzima busanzwe kuri uyu wa Kane maze kuganira n'abategeka leta zigize Amerika” Amagambo yatangajwe na Trump ejo mu ijambo avuga buri munsi uko iki cyoreze kifashe.

Kuri ubu Leta Zunze Ubumwe za Amerika ni yo imaze kuzahazwa cyane kurusha ibindi bihugu byose ku isi aho abarenga 638,000 muri iki gihugu babonyweho Covid-19 naho abarenga 30,800 yarabishe.

Trump yatangarije abanyamakuru ko imibare igaragaza ko Amerika yazahajwe na kino cyorezo ku kigero cyo hejuru, gusa ariko ngo barizera y'uko bizakemuka.

Abanyamakuru bamubajije impamvu Amerika ari yo iri kwibasirwa na kino cyorezo. Trump yasubije ko ibindi bihugu bibeshya imibare y'abanduye kino cyorezo harimo n’u Bushinwa. Avuga ko Amerika iri no kwiga ku makuru ataremezwa avuga ko iyi virus ya Covid-19 ishobora kuba yaravuye muri laboratoire i Wuhan, aho kuva mu isoko nk'uko bizwi.

Mu minsi ishize ni bwo Leta Zunze Ubumwe za Amerika yari yihaye itariki ya 01 z'ukwezi kwa Gatanu nk'igihe cyo gusubiza igihugu mu buzima busanzwe. Trump we yavuze ko leta zimwe zishobora kubusubiramo na mbere y'icyo gihe.

Bamubajije niba bitarushaho gushyira mu kaga Amerika mu gihe abantu basubiye mu buzima busanzwe vuba, Trump yasubije ati "No mu gukomeza gufunga harimo urupfu kuko no gukomeza gufunga bishobora kongera ibibazo byinshi birimo indwara zo mu mutwe, ndetse no kwiyahura bishobora kwiyongera cyane mu gihe n’ubukungu nabwo buri kujya ahabi."

Kuri ubu muri Amerika imibare y'abadafite akazi iri ku kigero kitigeze kibaho bitewe n'ingamba zafashwe mu kwirinda ko iki cyorezo cyakomeza gukwirakwira zirimo kuguma murugo n'izindi zitandukanye.

Src:bbc.com