Ibrahim Ajibu uheruka mu Rwanda yasubiye muri Simba SC nyuma y’imyaka ibiri

Ibrahim Ajib w’imyaka 23 uvuka i Dar Es Salaam, yatangiye umupira w’amaguru nyirizina mu 2009 akina mu ikipe y’abato ya Simba SC ubwo yari mu batarengeje imyaka 13. Mu 2013 yakiniye ikipe ya Simba SC y’abatarengeje imyaka 20 ubwo yari afite imyaka 17 y’amavuko.

Nyuma yo kwigaragaza muri Simba SC U20, abatoza baje kumuzamura mu ikipe nkuru asinyamo amasezerano y’imyaka ine yaje kumugeza mu 2017 ubwo yahitaga ajya muri Yanga Africans agasinyayo amasezerano y’imyaka ibiri (2017-2019). Mu myaka ine yakiniye Simba SC nkuru, yabatsindiye ibitego 46 mu mikino 55. Ajibu azwiho umwihariko wo gutanga imipira ivamo ibitego (assists).

Ibrahim Ajibu Migomba yasinye imyaka ibiri muri Simba SC yamuzamuye 

Mu mwaka we wa mbere muri Yanga Africans ni bwo yaje mu Rwanda ari kumwe n’iyi kipe mu mikino y’amatsinda ya Total CAF Confederations Cup 2017-2018 ubwo bahuraga na Rayon Sports ikanabasezerera.

Ibrahim Ajibu ubwo yari yicaye mu rwambariro rwa sitade ya Kigali mbere y'uko Yanga SC icakirana na Rayon Sports mu 2018

Ibrahim Ajibu (Iburyo) yicaranye na Deus Kaseke (Ibumoso) mu rwambariro rwa sitade ya Kigali 

Mu mwaka we wa nyuma muri Yanga SC nabwo yaje kubafasha kugera mu mikino y’amatsinda ya Total CAF Confederation Cup. Muri uyu mwaka w’imikino kandi, Migomba yatsinze ibitego icumi (10) harimo bine yatsinze mu mukino umwe bahuyemo na Mbao FC muri shampiyona 2018-2019.