Chelsea yatwaye igikombe cya UEFA Europa League inyagiye Arsenal-AMAFOTO

Ibitego bya Chelsea byatsinzwe na Olivier Giroud, Pedro Rodriguez na Eden Hazard watsinzemo ibitego bibiri anahita abasezera agana muri Real Madrid muri Espagne. Igitego kimwe rukumbi cya Arsenal cyatsinzwe na Alex Owimbi umunya-Nigeria.

Chelsea FC yaherukaga igikombe cya UEFA Europa League mu mwaka w’imikino 2012-2013. Umukino yanyagiyemo Arsenal ibitego 4-1 waberaga kuri Olympic Stadium iri i Baku mu gihugu cya Azerbaijan kuri uyu wa Gatatu tariki 29/05/2019.

Abakinnyi ba Chelsea bishimira igikombe 

Muri uyu mukino, ikipe ya Arsenal ni yo yatangiye isatira ndetse inaba iya mbere mu kubona imipira myinshi icaracara mu rubuga rw’amahina rwa Chelsea. Gusa uku kwinjira mu mukino hakiri kare ku ruhande rwa Arsenal ntabwo byayihaye umusaruro hakiri kare kuko mu gihe cya kabiri Chelsea yaje yahinduye ingamba bityo nayo itangira kugenda izamukana n’iminota y’umukino.

Abakinnyi ba Arsenal baguye mu kantu nyuma y'umukino 

Mu gice cya kabiri ni bwo ibitego bya Chelsea byatangiye kuza kuko ku munota wa 49’ ni bwo Olivier Giroud rutahizamu wa Chelsea wanakiniye Arsenal yafunguye amazamu mbere yuko Pedro Rodrguez yungamo ikindi ku munota wa 60’ w’umukino.

Eden Hazard umukinnyi w’umuhanga ukina aca mu mpande no hagati muri Chelsea yatsinze ibitego bibiri mu mukino birimo icyo yatsinze kuri penaliti ku munota wa 65’ mbere yo kungamo ikindi ku munota wa 72’ w’umukino.

Igitego kimwe rukumbi cya Arsenal cyatisnzwe na Alex Iwobi ku munota wa 69’ w’umukino nyuma yo kuba yari yinjiye mu kibuga nk’umukinnyi w’umusimbura.

Mu busanzwe ikipe ya Arsenal ni gacye ko yarushwa ijanisha mu gutinda gutakaza umupira ariko ku mugoroba w’uyu wa Gatatu yaje kurushwa kuko Chelsea yatindanye umupira ku kigero cya 51% mu gihe Arsenal byari 49%.

Chelsea yateye koruneri zirindwi (7) zavuye mu kuba yasatiraga cyane abakinnyi ba Arsenal bakarenza imipira bakiza izamu. Arsenal yateye koruneri eshanu (5) mu mukino. Chelsea yateye amashoti umunani (8) agana mu izamu iremamo ibitego bine mu gihe Arsenal yateye amashoti abiri agana mu izamu igakuramo igitego kimwe.

Abakinnyi ba Chelsea bishimira intsinzi 

Petr Czech umunyezamu wa Arsenal wahoze muri Chelea yatsinzwe ibitego bine ariko yanakuyemo byinshi

Abafana ba Arsenal bitahira mu gihe byari bimaze kuba 3-0

Alex Iwobi arekura ishoti ryavuyemo igitego

Eden Hazard yari afite umukino mu biganza asezera neza abafana ba Chelsea

Mesut Ozil nyuma yo gusimburwa yahise agwa agacuho

Penaliti ya Eden Hazard

Amarira ku bafana ba Arsenal i Baku

Ibyishimo ku bafana ba Chelsea

Eden Hazard (Ibumoso) na Cezar Azpilcueta (Iburyo/C) bishimira igikombe