AFCON U-17: Imikino y’itsinda rya kabiri yasize Cameroun ibonye amanota atatu, Senegal igabana na Maroc

Umukino ufungura iri rushanwa wasize Tanzania itsinzwe na Nigeria ibitego 5-4 mbere y'uko Angola itsinda Uganda igitego 1-0 mu mukino wari uwa kabiri w’itsinda rya mbere (A).

Imikino y’itsinda rya kabiri (B) yakinwe kuri uyu wa Mbere tariki 15 Mata 2019, Cameroun yiteguriye mu Rwanda yatsinze Guinea ibitego 2-0 mu gihe Senegal na Maroc bagabanye amanota bakanganya igitego 1-1.

Ibitego bya Cameroun byatsinzwe na Steve Regis Mvoue ku munota wa 42’ mu gihe Leonel Wamba Djouffo yatsinze igitego cya kabiri ku munota wa 72’ w’umukino.

Cameroun niyo kipe yo mu itsinda rya kabiri (B) yabashije kubona amanota atatu imbumbe 

Mu mukino Maroc yanganyijemo na Senegal igitego 1-1, igitego cya Maroc cyatsinzwe na Tawfik Bentayeb wafunguye amazamu ku munota wa 47’ mbere y'uko Aliou Badara Balbe wa Senegal yaje kwishyura ku munota wa 88’ w’umukino.

Kuri uyu wa Kabiri tariki 16 Mata 2019 harakomeza imikino y’umunsi wa gatatu w’irushanwa hakinwa imikino y’itsinda rya mbere (A) aho Nigeria igomba gucakirana na Angola (13h00’) naho Uganda igakina na Tanzania (16h00’).