Irushanwa rya SKOL Fly Cycling Club ryasize impano zibonetse rinaba umwanya mwiza wo kwigaragaza kuri Benediction Excel Energy CT-AMAFOTO

Muri iri rushanwa, hari hanarimo irushanwa ry’ababigize umwuga (Road Race) ari naho ikipe ya Benediction Excel Energy Continental Team yatwaraga icyo cyiciro iyobowe na Manizabayo Eric bita Karadiyo waje akurikiwe na Patrick Byukusenge mu gihe Uwizeyimana Bonaventure yafashe umwanya wa gatatu. Munyaneza Didier yaje ku mwanya wa kane mu ntera ya kilometero 126.

Manizabayo Eric bita Karadio yagenze intera ya kilometero 126 akoresheje 2h18’56” mu gihe asiga Byukusenge Patrick isegonda rimwe (1”). Aba bakinnyi bari bamaze iminota  30’ bagendana bityo bageze ku murongo Byukusenge Patrick nk’umukinnyi uba uyoboye abandi ba Benediction Excel Energy Continental Club aharira Manizabayo nk’umukinnyi ukiri muto ukeneye kuzamura urwego.

Manizabyo Etic bita Karadiyo umukinnyi wa Benediction Excel Energy Continetal Team agera ku murongo

Manizabyo Eric ahabwa igihembo nk'umukinnyi wa mbere

Uva ibumoso: Uwizeyimana Bonaventure, Manizabayo Eric na Patrick Byukusenge 

Uwizeyimana Bonaventure ahabwa igihembo cy'umwanya wa gatatu 

Byukusenge Patrick yasoje ku mwanya wa kabiri

Muri iri siganwa ry’abakinnyi bari mu cyiciro cy’abakuze, ryatangiye ubona riri ku rwego rwo hejuru n’umuvuduko wa kilometero 3,2 mu minota itanu (3,2 Km/5min). Bagitangira kuzenguruka, Nkurunziza Yves wa Benediction niwe waje imbere azenguruka inshuro eshatu ayoboye mbere yuko aza gukurwaho na Byukusenge Patrick waje gukomeza kuyobora asimburanwa na Bonaventure Uwizeyimana.

Yves Nkurunziza yatangiye ayobora isiganwa 

Nkurunziza Yves acunga ko inyuma yaba akurikiwe 

Nyuma gato ni bwo Uwizeyimana Bonaventure yasubiye inyuma atangira gukina acungana n’abakinnyi ba Les Amis Sportifs bityo biha umwanya Manizabayo Eric kubona ubuhumekero ahita acomoka asanga Byukusenge Patrick amufasha kuyobora isiganwa kugeza ubwo bari basigaje kuzenguruka kabiri bamaze kwizera ko isiganwa ari iryabo.

Muri iri rushanwa hari harimo abakinnyi ba Benedictio Excel Energy Continental Team barindwi (7) bari banarimo Ukiniwabo Rene Jean Paul baheruka gusinyisha avuye muri Les Amis Sportifs de Rwamagana. Ndayisenga Valens ufite Tour du Rwanda ebyiri (2014, 2016) yari yaje gukina ariko ntibyamuhira kuko igare rye ryahise ritoboka ipine ava mu isihganwa atyo.

Manizabayo Eric amaze gusoza isiganwa yavuze ko yishimiye kwitwara neza mu irushanwa ritari ryoroshye ndetse akaba yari yiteguye neza kimwe na bagenzi be kandi ngo ni ko bari babiteguye.

“Isiganwa ryari rikomeye ariko ntabwo ryari rikomeye cyane kuko twari twariteguye neza tunafite umugambi wo gutsinda kandi twabigezeho. Twabaye bane ba mbere bava mu ikipe imwe, ibyo twari twateguye byose nta na kimwe cyapfuye mfatanyije na bagenzi banjye” Manizabayo

Manizabayo Eric inyuma ya Byukusenge Patrick bafatanyije urugendo rugera ku ntsinzi 

Manizabayo avuga ko ashimira Byukusenge Patrick wamufashije mu muhanda ndetse akaza kumureka bageze ku murongo akamubwira ko agomba gutsinda kuko ngo ni umuyobozi we ufasha abakinnyi mu nzira.

“Erega Patrick ni umuyobozi wanjye. Burya umuntu uyobora iyo atsinze nawe urishima. Yamfashije mu muhanda arangije arandeka ndatsinda, ndabimushimira kandi ngashimira ikipe yanjye twafatanyije”. Manizabayo

Manizabayo akanda igare naryo rimukanda mu mihanda yo mu nganda

Ivan Wullfaert umuyobozi w'uruganda rwa SKOL nawe yakoze inshuro 22 mu cyiciro cy'abishimisha

 

Byukusenge Patrick mu mihanda yo mu nganda 

Muri gahunda y’irushanwa icya mbere bagombaga kubanza gushaka abakinnyi bafite impano kurusha ibindi byose byari biteganyijwe. Aha ni ho abakinnyi bari bavuye hirya no hino mu gihugu bahawe umwanya bajya mu muhanda bakora intera ya kilometero 48 kuko bakoraga kilometero 3,2 bakazenguruka inshuro 15. Aba bakinnyi batarengeje imyaka 17 bakoreshaga amagare asanzwe akoreshwa (Pneu Ballons).

Mu gushaka abakinnyi bafite impano hakoreshwa amagare asanzwe 

Muri iki cyiciro, Bizimana Theogene w’i Muhanga mu ntara y’Amajyepfo ni we waje ku isonga akoresheje 1h09’19” aza akurikiwe na Nyaminani Erneste nawe uvuka mu karere ka Muhanga wamuje inyuma akoresheje 1h09’29” naho Sibomana Ferdinand aza ku mwanya wa gatatu akoresheje 1h09’39”.

Bizimana Theogene w'i Muhanga agera ku murongo aserukira abari gushaka kuzakina igare mu buryo bunononsoye 

Aba bakinnyi batatu ba mbere bahise bashyirwa ku rutonde rw’abagomba kuzajya mu ikipe ya SKOL Fly Cycling Club kugira ngo bakoreremo imyitozo ikakaye bityo harebwe niba bazavamo abakinnyi babigira umwuga bikaba byabafasha mu buzima bwabo bw’ejo hazaza.

Muri iki Cyiciro, hahembwe abakinnyi barindwi (7) ba mbere bagize ibihe byiza kurusha abandi. Abakinnyi bahembwe muri rusange barimo; Bizimana Theogene (1), Nyaminani Erneste (2), Sibomana Ferdinand (3), Irariza Jean Marie Vianney (4), Bikorimana Theoneste (5), Masumbuko Regis (6) na Hategekimana Eric (7).

Muri iri rushanwa kandi ikipe ya SKOL Fly Cycling Club nayo yari mu makipe yahatanaga mu cyiciro cy’abakinnyi bakiri bato basanzwe bakina umukino w’amagare aho bahuye n’abakinnyi ba Les Amis Sportifs de Rwamagana bikarangira Nsabimana Jean Baptiste wa SKOL Fly Cycling Club atwaye isiganwa asize bagenzi be mu buryo bugaragara kuko hari abo yakoreyeho umuzenguruko bahita banava mu isiganwa nk’uko amategeko y’irushanwa yabivugaga.

Nsabimana Jean Baptiste wa SKOL Fly Cycling Club yaje ari uwa mbere mu ngimbi 

Muri iki cyiciro, Hategekimana Jean Bosco (Les Amis) yaje ku mwanya wa kabiri mu gihe Gahemba Bernabe yaje ku mwanya wa gatatu akoresheje 2h09’42” mu ntera ya kilometero 100.

Gahemba Bernabe murumuna wa Areruya Joseph yatwaye umwanya wa 3 mu ngimbi

Ingimbi zihatana mu kuzamura urwego kuko nibo bazavamo ibihangange 

Nsabimana Jean Baptiste yaje ku mwanya wa mbere mu ntera ya kilometero 100 akoresheje 2h07’28” mu gihe Hategekimana Jean Bosco yaje ku mwanya wa kabiri akoresheje 2h09’11”. Aba bazengurukaga inshuro 25 intera ya kilometero 3,2.

Benurugo Kayihura Emilienne umukozi muri SKOL ushinzwe gutegura n’imigendekere myiza y’ibikorwa uru ruganda ruba rwateguye akaba ari nawe wari uhagarariye SKOL muri iki gikorwa cy’irushanwa, yabwiye abanyamakuru ko irushanwa ryagenze neza kandi ko bishimira iterambere ry’irushanwa bagereranyije n’uko byagenze umwaka ushize ubwo ryabaga ku nshuro ya mbere.

“Irushanwa ryagenze neza kuko iyo umuntu ateguye irushanwa bwa mbere biba ari igerageza, ubu byari ku nshuro ya kabiri turikoze kandi ryagenze neza. Kuri iyi nshuro twabonye irushanwa rikomeye kuko abenshi mu bakinnyi ntabwo bagiye basoza isiganwa, tugomba guhozaho kugira ngo ubutaha tuzabone abakinnyi hafi ya bose basoza”. Benurugo

Benurugo Kayihura Emilienne avuga ko muri iri rushanwa riba rigamije gufasha abakinnyi kubona imyitozo ihagije ari nayo mpamvu usanga abakinnyi babigize umwuga bashyirirwaho icyiciro kugira ngo banereke urugero abari gushaka amahirwe yo kujya muri SKOL Flying Cycling Club.

Benurugo yasoje avuga ko iri rushanwa ryari riherekejwe n’ikinyobwa cya PANACHE muri gahunda yo gukomeza gufasha abakunzi b’umukino w’amagare gusoza impera z’icyumweru banatangira ikindi cyumweru nta munaniro.

Munyaneza Didier yahageze ari uwa kane mu bakuru      

Uwizeyimana Bonaventure ari mu bayoboye isiganwa rigitangira 

Manizabyo Eric yageze ku murongo aseka 

Manizabayo anywa amazi kuko ubushyuye bwari mu nganda bwari bwinshi 

Abageze mu nganda ntabwo bibwe n'igare kuko byari ibirori

Abakinnyi bari bavuye i Muhanga baje gushaka amahirwe yo kwinjira muri SKOL Fly Cycling Club

Mbere y'uko ingimbi zihaguruka 

Mbere gato y'uko abakuru bahaguruka 

Munyaneza Didier ufite shampiyona y'u Rwanda 2018 mbere yo guhaguruka 

Byukusenge Patrick (Ibumoso) yiteguye kuyobora bagenzi be ba Benediction Excel Energy Continental Team 

Rugamba Janvier wa Les Amis Sportifs na morale nyinshi mbere yo gutangira isiganwa 

Uwizeyimana Bonaventure (Ibumoso) na Nkurunziza Yves (Iburyo)

Ukiniwabo Renee Jean Paul yari yaje mu mwambaro wa Benediction EE.CT nk'umukinnyi wayo mushya 

Mugisha Moise uheruka kuzana umudali wa Zahabu muri shampiyona ya Afurika 2019 ni umukinnyi wa Fly Cycling Club ya SKOL

Ndayisenga Valens ntabwo yasoje isiganwa 

Mbere y'uko abashaka amahirwe bahaguruka 

Mu muhanda basiganwa 

Umwe muri aba bana yari yambaye umwenda w'umuhondo wa Tour de France 

Batatu ba mbere muri buri cyiciro biyeretse abafana