Kayonza: BRALIRWA yatanze amatara 283 akoresha imbaraga ziva ku mirasire y’izuba mu murenge wa Ndego-AMAFOTO

Kuri uyu wa Gatandatu tariki 02 Ukuboza 2017 nibwo habaye igikorwa cyo gutaha ku mugaragaro aya matara akoresha ingufu ziva ku mirasire y’izuba mu karere ka Kayonza, umurenge wa Ndego mu midugudu itandukanye. Byabanjirijwe n’umuganda aho abakozi ba BRALIRWA bafatanyije n’abaturage bo mu murenge wa Ndego gutera ibiti cyane ko muri ako gace hagaragara ikibazo gikomeye cy’ibura ry’ibiti.

Abakozi ba Bralirwa n'abaturage bo muri Ndego babanje gukora umuganda wo gutera ibiti

Inzego zishinzwe umutekano zaje kwifatanya na Bralirwa mu muganda

Ubuyobozi bw’akarere ka Kayonza ndetse n’ubw’umurenge wa Ndego bwashimiye cyane BRALIRWA ku nkunga yabahaye, ifatanyije na Mobisol bakabagenera amatara akoresha ingufu z’imirasire y’izuba yatwaye akayabo ka Miliyoni Cumi n’eshanu z’amafaranga y’u Rwanda (15,000,000 Rwf)

Iki gikorwa cyatwaye amafaranga milliyoni cumi n'eshanu z'amanyarwanda

Umusaza Rukavu Sylivestre wahawe aya matara yabwiye Inyarwanda.com ko ashimira cyane ubuyobozi bwa BRALIRWA ndetse na Leta y’u Rwanda kuba bakomeza kubazirikana bakareba ibibazo bafite bakabikemura. Yagize ati “

Bampaye imirasire, ndishima cyane. Ari njye ari n’umucecuru wanjye mbere twakoreshaga agatadowa ubuzima bwacu bwose, hakaba n’ubwo twaburaga agapeterori tukamara igihe tuba mu kizima. Ariko ubu noneho ndakanguka naba mbuze ibitotsi nkafata Bibiliya yanjye nkasoma. Naranezerewe, twashimiye abaduhaye imirasire ndetse natwe turabasabira imigisha.”

Umusaza Gakwavu avuga ko yishimiye aya matara

Si uyu musaza gusa, n’abandi bahawe aya matara bashimira cyane BRALIRWA kuba yarabafashije kubamurikira ku bufatanye na Mobisol. Batunguwe cyane no kuba ibi byarakozwe n’uruganda bajyaga bumva ko rukora inzoga na Fanta gusa.

Abakozi ba BRALIRWA n'aba Mobisol basuye imwe mu miryango bahaye aya matara

Umwe mu bacecuru bakuze cyane wahawe aya matara nawe yaranezerewe cyane. Ubwo abakozi ba BRALIRWA na Mobisol ndetse n’ubuyobozi bwamusuraga yabagaragarije ibyishimo. Yabwiye Inyarwanda.com ko yishimiye cyane ibyo yakorewe “Nabashimye cyane kandi nashimiye umubyeyi wanjye Perezida Paul Kagame. Yarankoreye!Yarankoreye!...Nishimye, ndanezerewe, ibinezaneza byansaze. Umubyeyi yaduhaye ayo mashanyarazi…atuzanira abo muri BRALIRWA umucecuru arababonye… turabanezerewe cyane…”

Umucecuru ashimira cyane BRALIRWA na Perezida wa Repubulika y'u Rwanda

Umuyobozi wari uhagarariye BRALIRWA, Fredy yasobanuye zimwe mu mpamvu bahisemo guha amatara akoresha imbaraga zituruka ku mirasire y’izuba aba baturage bo mu murenge wa Ndego “Twatanze aya matara ku baturage bo mu murenge wa Ndego, duhereye ku bo mu cyiciro cya 1 cy’ubudehe. Nk’uko mwabibonye aho twagiye ntabwo amashanyarazi asanzwe arahagera…Twatoranyije uyu murenge kubera ko hari ibikorwa tuhafite bya BRAMIN, bitanga akazi mu mirima yacu…Twatangije umuganda wo gutera ibiti kuko aha hantu hameze nk’ubutayu hakeneye ibiti cyane. Twarebye imibereho y’abaturage baho kugira ngo abana bashobore kujya biga nijoro…batere imbere. Niyo nkunga yacu mu gufatanya na Leta kubateza imbere duha aya mashanyarazi imiryango dufatanyije na Mobisol isanzwe ikora ibijyanye n’ayo matara.”

Fredy umuyobozi muri BRALIRWA asobanura iby'iki gikorwa

BRALIRWA yageneye iyi mirasire imiryango itishoboye 283 yo mu murenge wa Ndego. Ikaba yarakoresheje amafaranga y’u Rwanda 15,000,000.

 ANDI MAFOTO:

 Itorero 'Utunyange' ryasusurukije abari aho

Umunyamabanga Nshongwabikorwa w'umurenge wa Ndego yishimiye igikorwa BRALIRWA yabakoreye

Umuyobozi wa BRALIRWA na Vice Mayor ushinzwe imibereho myiza y'abaturage mu karere ka Kayonza

 Abakozi ba Bralirwa bafatanyije n'abaturage bo muri Ndego gutera ibiti

Abayobozi ba Bralirwa, Mobisol, Kayonza na Ndego basuye bamwe mu bagenerwabikorwa

Umuyobozi ushinzwe imibereho myiza y'abaturage mu karere ka Kayonza yashimiye cyane BRALIRWA

Imwe mu mirima ya BRAMIN 

 AMAFOTO: Iradukunda Disanjo_Inyarwanda Ltd.