Uwamahoro Desange, umunyarwandakazi uba mu gihugu cya Finland yamaze na we kwinjira muri muzika, yiyongera ku mubare w’abanyarwandakazi bakorera muzika hanze y’u Rwanda.
Desange avuga ko yatangiye kuririmba akiri muto afite imyaka 10 gusa. Icyo gihe ngo yaririmbaga muri korali. Desange avuga ko yakuze abantu bamubwira ko afite impano muri muzika bityo ko adakwiriye kuyipfusha ubusa. Mu myaka 2 ishize nibwo yari yabanje kujya muri studio gukora indirimbo ariko kubera impamvu z’amasomo byatumye atabasha kuyimenyekanisha no kuyikurikirana.
Kuri uyu wa mbere tariki 23 Mutarama 2017 nibwo yashyize hanze indirimbo ye ya mbere yise ‘Mfata’ yafatanyije na Aime Bluestone ndetse na Lil G, bituma yinjira mu buryo bweruye muri muzika. Desange avuga ko impamvu yahisemo gukorana n’aba bahanzi ngo ari uko ari bamwe mubamworohereje gukorana na we, bikiyongeraho ko asanzwe abaziho n’ubuhanga.
Aganira na Inyarwanda.com yagize ati “Ubwo nari ngiye gukora iriya ndirimbo, nasabye Aime Bluestone ko twakorana, mbisaba na Lil G bitewe n’uko indirimbo yanjye yari yanditse. Nabahisemo kuko basanzwe bazi kuririmba , kubw’amahirwe barananyorohereza, baramfasha.”
Afite inzozi ashaka kugeraho muri muzika
Desange yongeyeho ko gufatanya n’abandi bahanzi bagenzi be bamutanze muri muzika ari bumwe mu buryo buzamufasha gukabya inzozi ze. Ati “Mfite byinshi ngomba gukora kugira ngo impano yanjye nyikuze igere ku rwego rwiza. Ndashaka kuba umwe mubahanzikazi bafite ibihangano bihamye. Sinzabigeraho ntakoze. Ndi gukora cyane kandi mfite izindi ndirimbo nzashyira hanze vuba aha. Inzozi zanjye ni ukuba umwe mubahanzi bakunzwe n’abanyarwanda…kubigeraho ntibyoroshye ariko gushaka ni ugushobora…nzafatanya n’abamaze kuntanga mu kibuga, nziko nzabigeraho.”
Desange avuga ko yiringiye ko Imana izamufasha akagera ku ntego ze. Kugeza ubu avuga ko ibihangano bye azajya abikora mu njyana ya RnB akazajya ayivanga n’injyana ya kinyafurika. Amashusho y’iyi ndirimbo, Desange avuga ko nayo atazatinda kujya hanze.
Kanda hano wumve indirimbo ‘Mfata’ ya Desange afatanyije na Aime Bluestone na Lil G
Eng
RSS 
TANGA IGITECYEREZO